Voś chto toj «režysior», jaki padmanam stvaryŭ film pra vilenskuju i biełastockuju emihracyju
Alaksiej Marcinionak bolš za 15 hadoŭ pracuje ŭ strukturach biełaruskaha telebačańnia, ale nikoli nie byŭ na pieršych rolach. Raskazvajem pra jaho.
Alaksiej Marcinionak u 2016 hodzie. Skrynšot z telekanała STB
Alaksieju Marcinionku 37 hadoŭ. Pa źviestkach Digital Intelligence Team, jon naradziŭsia i vyras u Minsku.
Vučyŭsia ŭ škole №177 va Uruččy, dzie pracavała jahonaja maci, a paśla pastupiŭ u Biełaruski dziaržaŭny ahrarny techničny ŭniviersitet.
U maładości Marcinionak zachaplaŭsia rokam, asabliva ruskim. Naprykład, u 2011 jon jeździŭ na fiestyval «Našeście» ŭ Ćviarskuju vobłaść Rasii.
Zvarotnaja daroha ź fiestyvalu. Fota sa staronki Marcinionka ŭ «Adnakłaśnikach»
Tady rokiery vystupali ŭsie razam. Naprykład, u 2011 hodzie na fiestyvali sychodzilisia Lapis Trubiacki, Vopli Vidaplasava, Akijan Elzy i hurty, jakija ciapier horača padtrymlivajuć rasijskaje ŭvarvańnie va Ukrainu (naprykład, Alisa, Sieŕha i Haryk Sukačoŭ). A na adnoj teatralnaj scenie vystupali Viera Pałazkova, uniesienaja ciapier za antyvajennuju pazicyju ŭ śpis terarystaŭ, i Ivan Achłabyścin, jaki molicca na Pucina.
Marcinionak u rokierskija hady ŭ Krymie. Nulavyja. Fota ź jahonych adnakłaśnikaŭ
Marcinionak trapiŭ na Biełaruskaje telebačańnie ŭ 2008 hodzie. Spačatku jon pracavaŭ na STB. Akramia źjaŭleńnia ŭ epizadyčnych rolach u kadry, jon byŭ ekanamistam finansava-ekanamičnaha abhruntavańnia.
Alaksiej Marcinionak viadzie pieradaču «Piać chvilin». Fota: Adnakłaśniki
U 2016 pierajšoŭ na pracu ŭ Ahienctva telenavin (ATN), ale zorkaj tak i nie staŭ. Jon zdymajecca ŭ śpiecprajektach ahienctva telenavin, udzielničaje ŭ niekatorych prajektach. Na kaniec 2024 hoda Marcinionak byŭ na pasadzie palityčnaha ahladalnika ŭ adździele ahladalnikaŭ hałoŭnaj dyrekcyi ATN.
Marcinionak u składzie delehacyi biełaruskich miedyjščykaŭ u Kitai ŭ 2012 hodzie. Fota: en.people.cn
Ciapier jaho vyrašyli pasprabavać na pasadzie režysiora. Padobna, što nasamreč režysiorskaha dośviedu ŭ jaho abo zusim niama, abo niebahata.
Alaksiej Marcinionak. Fota ź jahonaj staronki Ukantakcie
U čym jaho ŭniosak u stvareńni prapahandysckaha filma «Čužoje nieba», nie da kanca zrazumieła. Jon prezientavany jak režysior, ale nasamreč absalutnuju bolšaść kantentu padmanutyja emihranty zapisali sami. Unutry Biełarusi zapisvaŭsia tolki manałoh hałoŭnaj hieraini Julii Brykinaj-Barysavaj.