BIEŁ Ł RUS

Davydźka pajechaŭ u Rasiju pabiracca pa starych siabrach i pierastaŭ płacić za mabilny — jaho padchapiŭ kryptabiznesmien

29.03.2025 / 15:43

Nashaniva.com

Telehram-akaŭnt na numary telefona, jaki raniej naležaŭ prapahandystu i akcioru Hienadziu Davydźku, ź niadaŭniaha času staŭ publikavać dziŭnyja rečy — skrynšoty sotniaŭ tysiač dalaraŭ na kryptakašalkach, raźjezdy maładych ludziej na premijalnych mašynach. Nazva profila skaraciłasia da łakaničnaha «Hiena». Sam Davydźka ŭ hety čas zarablaje na treciaradnym rasijskim tok-šou i padpracoŭvaje ŭ staroha tavaryša Ihara Uholnikava. 

Na minułym tydni telehram-akaŭnt byłoha načalnika BT Hienadzia Davydźki apublikavaŭ karotkuju storyz dla tych, chto maje jaho ŭ kantaktach — sapraŭdny ci skampilavany skrynšot kryptakašalka z 625 tysiačami dalaraŭ na im. 

Źmianiłasia i avatarka profilu. Zamiest ščacinistaj fizijanomii znakamitaha artysta ŭźnikła malavanaja karcinka na hanhstarskuju tematyku.

Sam akaŭnt staŭ premijalnym i byŭ pieraviedzieny ŭ razrad biznes-profilu z paznačanym časam raboty. Pasłuhi — abmien i vyvad kryptavalut.

Praź niekalki dzion z akaŭnta Davydźki dla surjoznaści byli zapoščany paru videa, jakija ilustrujuć, jak maładyja ludzi raśsiakajuć vulicy načnoha horada na premijalnym «miersiedesie».

Pryznać daŭno nie junaha biełaruskaha artysta ŭ ciomnavałosym padletku za styrnom Brabusa niemahčyma. 

Skrynšot storyz vykładzienych u były akaŭnt Davydźki ŭ telehram

Chacia novy ŭłaśnik taksama pradstaŭlecca Hienam, nijakaj razmovy na temu kultury i mastactva padtrymać nie moža, adrazu adpraŭlaje takich surazmoŭcaŭ u ban. Sam akaŭnt nazyvajecca «Hiena TRC 20». 

Najbolš imavierna, što stary numar telefona Davydźku bolš nie naležyć. Možna tolki vykazać zdahadku, što Davydźka pierastaŭ jaho apłačvać, i tamu ŭ numara źjaviŭsia novy haspadar.

A što sam Hienadź Branisłavavič? Imavierna, ciapier jon u asnoŭnym karystajecca rasijskimi numarami telefonaŭ.

Pra byłoha načalnika BT, deputata, palityka, dramaturha, ideołaha, palitołaha, artysta, žurnalista, scenarysta, publicysta, demahoha, kanjunkturščyka Hienadzia Davydźku zusim zabyła radzima.

BiełTA apošni raz zhadvała jaho ŭ 2023 hodzie. Nijakaj pasady ŭ Biełarusi paśla skančeńnia apošniaj deputackaj kadencyi Davydźku nie prapanavali.

Pryčyny takoha staŭleńnia Łukašenki da adnaho z samych kryklivych svaich prychilnikaŭ nieviadomyja. 

Miarkujučy pa dastupnaj u internecie infarmacyi, ciapier centr žyćciovych intaresaŭ Davydźki źmiaściŭsia ŭ Rasiju, dzie jon apošnija hody šukaje prymianieńnia svaim talentam. 

Hienadź vystupaje suviadučym u prahramie razmoŭnaha žanra na jutub-kanale «Sajuznaje vieča», jaki finansujecca ź biudžetu «sajuznaj dziaržavy». 

Davydźka navat nie načalnik redakcyi, a zvyčajny ahladalnik treciaradnaj prapahandysckaj pieradačy. 

Jak možna mierkavać, Davydźku dali padpracoŭku ŭ prajekcie jahonaha staroha tavaryša Ihara Uholnikava. Toj jak režysior zdymaje za biudžetnyja hrošy film pra biełaruskaha partyzana Minaja Šmyrova. A Davydźka — kreatyŭny pradziusar filma.

Davydźka z Uholnikavym majuć vopyt sumiesnaha zasvojvańnia biudžetnych srodkaŭ — u 2010-ch jany paraj viali andehraŭndnaje palityčnaje tok-šou «Čas Sajuza». 

Duet papularnych viadučych, 2011 hod, fota: bsj.by

Budučy zabytym u Biełarusi, Davydźka marna sprabuje dakryčacca da minskich uładaŭ z hłybiń rasijskich infarmacyjnych padvałaŭ.

«Alaksandr Łukašenka — najaŭtarytetniejšaja palityčnaja fihura na prastory ziamnoha šara. U Jeŭropie takich palitykaŭ nie zastałosia ŭžo. Aproč Uładzimira Pucina, nu i ładna, skažu: Erdahana. Usie — nadkušanyja šakaładki, paŭmužčynki ŭ paŭkiedach, zhraja husiej. A tut — mahutnaja palityčnaja fihura. Dy chaj choć viečna budzie na čale našaj dziaržavy», — frahmient apošniaha vystupleńnia Davydźki. 

Čytajcie taksama:

Kamientary da artykuła