Znoŭ aryštavali złodzieja ŭ zakonie Pašteta — uziaŭsia za staroje i padmanvaŭ piensijanieraŭ
Pres-słužba MUS paviedamiłai pra aryšt 43-hadovaha minčuka — «złodzieja ŭ zakonie» Paŭła Aleksiajeviča (mianuška Paštet), jaki razam z 43-hadovym saŭdzielnikam dapamahali złamyśnikam vyvodzić skradzienyja ŭ biełarusaŭ hrošy.
Skrynšot videa MUS
Paštet źviazaŭsia z pradstaŭnikami ŭkrainskaha koł-centra i, karystajučysia statusam «kryminalnaha aŭtaryteta», prapanavaŭ supracoŭnictva. Na praciahu paŭhoda jon z padzielnikam pieravodziŭ srodki, atrymanyja ad achviar afierystaŭ, u kryptavalutu i pieradavali zakazčykam pry asabistych sustrečach u Minsku. Za svaje pasłuhi brali 27% ad sumy, paviedamlaje pres-słužba MUS.
Hramadzian Biełarusi (u asnoŭnym pažyłych) padmanvali ad imia milicyi i pradstaŭnikoŭ apierataraŭ sotavaj suviazi. Dakładna viadoma pra nie mienš za 57 epizodaŭ na sumu zvyš 370 tysiač rubloŭ.
U chodzie pieratrusaŭ u zatrymanych kanfiskavanyja hrošy i majomaść, jakija buduć vykarystanyja dla pahašeńnia škody, naniesienaj paciarpiełym.
Zaviedziena kryminalnaja sprava za machlarstva.
Pavieł Aleksiajevič (Paštet) vyzvaliŭsia tolki vosieńniu 2024 hoda. Usiaho ž za svajo 43-hadovaje žyćcio Aleksiajevič adsiedzieŭ šeść razoŭ, uklučajučy dva terminy pa prysudach rasijskich sudoŭ, kali ŭžo značyŭsia ŭ kryminalnaj ijerarchii złodziejem u zakonie. Pa apošnim vyzvaleńni žyŭ u Minsku, dzie jamu ŭstanavili nahlad terminam na 1 hod.