Telegram zabłakavaŭ rasijski insajdarski kanał ź miljonam padpisčykaŭ pa patrabavańni rasijskich uładaŭ
Papularny kanał «VČK-OHPU», jaki mieŭ bolš za miljon padpisčykaŭ i śpiecyjalizavaŭsia na publikacyi infarmacyi ab dziejnaści rasijskich siłavych struktur, byŭ zabłakavany siońnia nočču biez tłumačeńnia pryčyn.
U lipieni 2024 hoda Ministerstva justycyi Rasii ŭniesła «VČK-OHPU» ŭ rejestr zamiežnych ahientaŭ, abvinavaciŭšy kanał u raspaŭsiudžvańni niedakładnaj infarmacyi ab rašeńniach rasijskich uładaŭ i farmiravańni niehatyŭnaha vobraza Uzbrojenych sił Rasii. U śniežni taho ž hoda Tahanski rajonny sud Maskvy aštrafavaŭ Telegram na 4 miljony rubloŭ za nievykanańnie patrabavańniaŭ ab vydaleńni kanała.
Redakcyja «VČK-OHPU» adznačaje, što inšyja kanały, zhadanyja ŭ pastanovie suda, taksama byli zabłakavanyja, a ich spasyłki apynulisia ŭ rukach asob, źviazanych z rasijskimi ŭładami, što śviedčyć ab kaardynacyi dziejańniaŭ.
«Vyhladaje, Telegram vyrašyŭ vykanać patrabavańnie rasijskich uładaŭ (Hienprakuratury i Raskamnahladu) i vydalić «VČK-OHPU» za publikacyju «infarmacyi, nakiravanaj na destabilizacyju hramadska-palityčnaha stanovišča ŭ Rasijskaj Fiederacyi, jakaja dyskredytuje dziejańni orhanaŭ dziaržaŭnaj ułady Rasijskaj Fiederacyi i Uzbrojenych Sił Rasijskaj Fiederacyi». Adbyłosia heta nieŭzabavie paśla taho, jak uładalnik telehram Pavieł Duraŭ pakinuŭ Francyju i apynuŭsia ŭ AAE. Ci źviazanyja hetyja padziei — budzie zrazumieła zusim chutka», — napisali aŭtary kanała.
Redakcyja kanała paviedamiła, što z 2024 hoda ŭ Jeŭrasajuzie viadziecca rasśledavańnie sprobaŭ zamachu na zasnavalnika kanała, jakija, pavodle ich dadzienych, byli arhanizavany adnoj z rasijskich śpiecsłužbaŭ. U žniŭni 2024 hoda zasnavalnik kanała byŭ špitalizavany z vostrym atručvańniem nieviadomaha pachodžańnia i pravioŭ u balnicy dva miesiacy.