U suviazi sa źniknieńniem Mielnikavaj polskaja palicyja praviaraje pahrozy na adras Łatuški

U Narodnym aktykryzisnym upraŭleńni raskazali pra dadatkovuju pravierku pahroz, jakija pastupajuć na adras kiraŭnika NAU i namieśnika kiraŭnicy Abjadnanaha pierachodnaha kabinieta Paŭła Łatuški. Heta stała adkazam na źniknieńnie śpikierki Kaardynacyjnaj rady Anžaliki Mielnikavaj, piša «Biełsat».

Pavieł Łatuška (u centry) sa Śviatłanaj Cichanoŭskaj i Anžalikaj Mielnikavaj na akcyi 26 studzienia 2025 hoda ŭ Varšavie. Fota: Vasily Krestyaninov / SOPA / Images LightRocket via Getty Images

«U suviazi sa źniknieńniem Anžaliki Mielnikavaj pravaachoŭnyja orhany Polščy zaprasili dadatkovyja danyja z metaj acenki patencyjnych ryzyk i pahroz u adnosinach da Paŭła Łatuški», — paviedamili ŭ pres-słužbie NAU ŭ adkaz na zapyt karespandenta «Biełsata».

Raniej Pavieł Łatuška i kamanda NAU zajaŭlali, što pieryjadyčna atrymlivajuć pahrozy raspravaju. U darknecie navat była źmieščana abviestka adnosna taho, kolki kaštuje žyćcio palityka. Praz hetyja pahrozy prakuratura ŭ Polščy pačała rasśledavańnie złačynstva pavodle artykułaŭ ab padbuchtorvańni, zabojstvie i dziejnaści zamiežnych śpiecsłužbaŭ.

«Hetyja pahrozy, jakija vyličajucca dziasiatkami, ažyćciaŭlajucca roznymi sposabami publičnaha i niepubličnaha charaktaru. Pahrozy ździajśniajucca nie tolki ŭ Polščy, ale i na terytoryjach inšych krain-siabraŭ ES. Varta adznačyć, što ź vieraśnia hetaha hoda kolkaść pahrozaŭ značna pavialičyłasia», — raskazaŭ Łatuška 20 śniežnia 2024 hoda paśla dačy pakazańniaŭ u Akruhovaj prakuratury Varšavy.

Kamientary da artykuła