Z sajta NAU prybrali zhadku pra Anžaliku Mielnikavu

Z sajta Narodnaha antykryzisnaha ŭpraŭleńnia ŭ raździele «Pra nas» źniali infarmacyju pra źnikłuju supracoŭnicu NAU, a taksama śpikierku Kaardynacyjnaj rady Anžaliku Mielnikavu. 

Abnoŭlena. Paźniej fota Mielnikavaj znoŭ źjaviłasia na sajcie.

Na aktualnaj viersii sajta NAU siarod asob, jakija supracoŭničajuć z arhanizacyjaj, nijakaj zhadki pra Anžaliku Mielnikavu ŭžo niama. 

Miž tym u archiŭnaj viersii za 31 sakavika Mielnikava na sajcie jašče prysutničaje ŭ jakaści daradcy pa stratehičnym płanavańni.

Ruskamoŭnaja viersija sajta NAU zachavałasia ŭ archivie za 6 krasavika, i tam Anžalika Mielnikava taksama jašče jość.

Pra źniknieńnie śpikierki Kaardynacyjnaj rady Anžaliki Mielnikavaj jaje kalehi paviedamili ŭviečary 28 sakavika. U zajavie Paŭła Łatuški havaryłasia, što suviaź adsutničaje z 25 sakavika, adnak havorka idzie pra anłajn-kamunikacyju. Nasamreč Mielnikavu ŭžyvuju nie bačyli ŭžo daŭnym-daŭno. Paźniej stała viadoma, što Anžalika Mielnikava pakinuła terytoryju Jeŭrasajuza 26 lutaha, a jaje były muž źjechaŭ z Polščy ŭ Biełaruś 3 sakavika.

7 krasavika žurnalistam «Lusterka» ŭdałosia parazmaŭlać z byłym mužam Anžaliki Mielnikavaj, jaki paćvierdziŭ, što znachodzicca ŭ Biełarusi, a dzieci — pry im. Baćki Mielnikavaj u razmovie z žurnalistam «Jeŭraradyjo» taksama paćvierdzili, što dzieci znachodziacca ŭ Biełarusi, a pra miescaznachodžańnie samoj Anžaliki jany sami ničoha nie viedajuć i tryvožacca.

8 krasavika vice-śpikierka Kaardynacyjnaj rady Stanisłava Hlińnik, jakaja ciapier vykonvaje abaviazki śpikierki, paviedamiła, što 13 sakavika z akaŭnta Anžaliki Mielnikavaj byli spampavanyja fajły, da jakich jana mieła dostup u ramkach pracy Kaardynacyjnaj rady. Siarod ich — stratehičny płan, biudžet, unutranyja dakłady i inšyja apieracyjnyja materyjały pačynajučy ź lipienia 2024 hoda.

10 krasavika telekanału «Biełsat» stała viadoma, što z rachunka fondu Białoruś Liberty, zasnavanaha Anžalikaj Mielnikavaj, źniali hrošy. Zrabiła heta jana sama ci chto inšy, pakul nieviadoma. 

Kamientary da artykuła