Biełarus sprabavaŭ tajemna pravieźci ŭ Rasiju dvuch ukraincaŭ. Jaho złavili i asudzili
Mužčynu ŭdałosia pierasiačy miažu ŭ Smalenskaj vobłaści, ale pa darozie jaho spynili daišniki.
Ilustracyjnaje fota: ANT
Hramadzianina Biełarusi asudzili ŭ Rasii za arhanizacyju niezakonnaj mihracyi. Jon sprabavaŭ tajemna pravieźci praź miažu dvuch ukraincaŭ, paviedamlaje pres-słužba suda ŭ Smalensku.
U lipieni 2024 hoda biełarus pierasiok miažu Rasii kala Krasnaj Horki Smalenskaj vobłaści. Jon jechaŭ na busie «Miersedes» z pryčepam. Užo na terytoryi Rasii mikraaŭtobus spynili supracoŭniki DPS.
Jany pravieryli pryčep i znajšli tam dvuch hramadzian Ukrainy, jakich biełarus tajemna pravioz praź miažu. Usich zatrymali, ukraincaŭ daišniki pieradali rasijskim pamiežnikam.
Biełarus pryznaŭ vinu i supracoŭničaŭ sa śledstvam. U vyniku jaho asudzili na hod pazbaŭleńnia voli ŭ kałonii-pasialeńni. Bus Mercedes-Benz Sprinter i pryčep RYDWAN PL0806 rasijski sud kanfiskavaŭ.