Upieršyniu dadatkova abmiežavali naviedvańnie na Radaŭnicu mohiłak u zonie adčužeńnia na miažy z Ukrainaj

Upieršyniu ŭviali dadatkovyja abmiežavańni pa naviedvańni mohiłak u dni Radaŭnicy na terytoryi Paleskaha radyjacyjna-ekałahičnaha zapaviednika. Usie papiarednija hady dazvalałasia naviedvańnie lubych mohiłak u zonie adčužeńnia na praciahu čatyroch dzion — z suboty pa aŭtorak. Ale ŭ 2025 hodzie prapuskać u vioski ŭ pamiežnaj pałasie Naraŭlanskaha rajona buduć tolki ŭ peŭnyja dni, piša «Fłahštok».

Fota: MNS

Mohiłki viosak Chutar-Les, Chatki, Barovičy možna naviedać tolki 27 krasavika z 10:00 da 15:00, a miescy pachavańnia ŭ byłoj vioscy Biełaja Saroka — tolki 27 i 29 krasavika z 8:00 da 17:00.

Aficyjna paviedamlałasia, što takija abmiežavańni ŭviedzienyja «pa rašeńni miascovych orhanaŭ ułady» biez paznačeńnia pryčyny.

Hetyja adsielenyja paśla katastrofy na ČAES vioski znachodziacca prosta na miažy z Ukrainaj. Hety ŭčastak miažy ličać adnym z samych składanych. Tut, akramia pamiežnikaŭ, na «ŭzmacnieńnie» nakiravany atrad «Ryś» śpiecnaza ŭnutranych vojskaŭ. Ułady bajacca dyviersantaŭ i ŭdarnych hrupovak, jakija hipatetyčna mohuć pryjści z terytoryi Ukrainy.

U niekatoryja inšyja adsielenyja vioski možna budzie trapić nie tolki ŭ dni Radaŭnicy. U Vietkaŭskim rajonie dadatkova 20 krasavika budzie adkryty prajezd na mohiłki viosak Barba, Kasickaja, Rudnia-Šlahina, Sivinka. 3 maja taksama biez propuskaŭ možna naviedać miescy pachavańnia ŭ byłych vioskach Dziarnovičy i Cieškaŭ u Naraŭlanskim rajonie, 9 maja — mohiłki viosak Barščoŭka, Buda, Małočki Chojnickaha rajona.

Usiaho ŭ Homielskaj vobłaści 183 mohiłak znachodziacca ŭ zonach adsialeńnia i adčužeńnia, ź ich 91 — na terytoryi Paleskaha dziaržaŭnaha radyjacyjna-ekałahičnaha zapaviednika. Štohod u dni paminańnia pamierłych ich u siarednim naviedvaje zvyš 10 tysiač čałaviek.

Kamientary da artykuła