Biržavyja indeksy ZŠA i dalar źnizilisia na fonie ataki Trampa na kiraŭnika Centrabanka
Akcyi na biržach ZŠA i dalar u paniadziełak znoŭ istotna stracili ŭ košcie. Analityki i presa źviazvajuć heta z tym, što prezident Donald Tramp znoŭ napisaŭ post pra kiraŭnika Fiederalnaha reziervu, nazvaŭšy jaho «poŭnym łuzieram» za toje, što toj nie źnižaje pracentnyja staŭki, piša Bi-bi-si.
Tramp u svajoj sacsietcy čarhovy raz u hrubaj formie zaklikaŭ kiraŭnika Fiederalnaj reziervovaj sistemy Džeroma Paŭeła «papieradžalna» źnizić staŭki FRS — to-bok, zrabić kredyty tańniejšymi. Tramp pierakanany, što heta padšturchnie ekanomiku.
«Ekanomika moža zapavolicca, kali mister Zanadta Pozna, poŭny łuzier, nie źnizić pracentnyja staŭki nieadkładna», — napisaŭ Tramp, paŭtaryŭšy svoj zaklik da Paŭeła, ź jakim jon vystupaŭ užo niekalki razoŭ.
Fiederalnaja reziervovaja sistema vykonvaje ŭ ZŠA funkcyi centralnaha banka, a niezaležnaść centralnaha banka ad vykanaŭčaj ułady ličycca adnoj z umoŭ stabilnaści finansavaj sistemy krainy i pradkazalnaści jaje hrašovaj palityki.
Impulsiŭnyja rašeńni Trampa adnosna impartnych pošlin užo pryviali da padzieńnia na amierykanskich biržach, i jaho kanflikt z Džeromam Paŭełam tolki dadaje rynku niervovaści.
Indeks S&P 500, jaki raźličvajecca na asnovie cany akcyj 500 najbujniejšych kampanij ZŠA, u paniadziełak źniziŭsia prykładna na 2,4%. Z pačatku hoda jon straciŭ užo kala 12%.
Indeks Dow Jones u paniadziełak straciŭ 2,5%, a z pačatku hoda — kala 10%.
Indeks akcyj vysokatechnałahičnych kampanij ZŠA, Nasdaq, u paniadziełak źniziŭsia bolš čym na 2,5%, a z pačatku hoda hetyja kampanii ŭ siarednim stracili ŭ košcie kala 18%. Dalar i dziaržaŭnyja ablihacyi ZŠA ŭ momanty niestabilnaści na finansavych rynkach zvyčajna ličacca nadziejnym prystaniščam dla kapitału, ale ŭ druhuju epochu Trampa viera ŭ ich taksama akazałasia niekalki padarvanaj.
Indeks dalara ŭ paniadziełak apuściŭsia da samaha nizkaha ŭzroŭniu z 2022 hoda, a z pačatku hoda jon straciŭ kala 11%.
Indeks dalara — heta siarednieŭzvažany kurs adnosna košyka z šaści inšych valut, pierš za ŭsio jeŭra (bolš za pałovu «vahi» ŭ košyku).
Pavysilisia i staŭki pa ablihacyjach ZŠA: inviestary chočuć atrymać bolš za toje, što ryzykujuć kredytavać Złučanyja Štaty.
U takoj situacyi tradycyjna raście ŭ košcie zołata. U paniadziełak jano pastaviła novy rekord — 3400 dalaraŭ za uncyju.
Tramp krytykavaŭ im ža pryznačanaha Paŭeła jašče ŭ svoj pieršy termin: jon užo tady, pavodle niekatorych źviestak, padumaŭ, jak by zvolnić kiraŭnika Fiederalnaha reziervu. Ciapier jon pastajanna, z momantu abrańnia prezidentam, zaklikaje Paŭeła źnizić staŭki.
Paśla ŭviadzieńnia Trampam impartnych pošlin Paŭeł vystupiŭ z papiaredžańniem, što heta moža pryvieści da rostu cen i zapavoleńnia rostu ekanomiki ZŠA.
Tramp na minułym tydni publična zajaviŭ, što Paŭeła treba zvolnić, napisaŭ u svajoj sacsietcy: «Vyzvaleńnie Paŭeła ad abaviazkaŭ nie cierpić adkładu».
Sproba administracyi zvolnić Paŭeła była b sprečnaj ź jurydyčnaha punktu hledžańnia i vyklikała b supraciŭ, uličvajučy tradycyjnuju niezaležnaść Centrabanka. Sam Paŭeł letaś skazaŭ žurnalistam, što, na jaho pohlad, u prezidenta niama paŭnamoctvaŭ na toje, kab jaho zvolnić.
Tym nie mienš, kali ekanamičnaha daradcu Trampa Kievina Chasieta ŭ piatnicu spytali, ci mahčyma zvalnieńnie Paŭeła, jon adkazaŭ, što administracyja vyvučyć hetaje pytańnie.