Pakistan zajaviŭ pra niepaźbiežnaść vajny ź Indyjaj i pryhraziŭ vykarystoŭvać jadziernuju zbroju

Pakistan čakaje nieminučaha vajennaha ŭvarvańnia z boku Indyi. Pra heta zajaviŭ ministr abarony hetaj krainy Chavadža Muchamad Asif u intervju Reuters, padkreśliŭšy, što Isłamabad užo ŭzmacniŭ svajo vojska.

Fota: Nasir Kachroo/NurPhoto via Getty Images

«My naraścili našy siły, pakolki ŭvarvańnie Indyi stała niepaźbiežnym. U hetaj situacyi nieabchodna było pryniać stratehičnyja rašeńni, i jany byli pryniatyja», — paviedamiŭ Asif.

Ministr adznačyŭ, što indyjskaja rytoryka stanovicca ŭsio bolš ahresiŭnaj. Pavodle jaho słoŭ, pakistanskija vajskoŭcy ŭžo prainfarmavali ŭrad pra vysokuju ryzyku napadu z boku Indyi.

Pry hetym Asif admoviŭsia ŭdakładnić, jakija mienavita abstaviny, na jaho dumku, śviedčać pra niepaźbiežnaść uvarvańnia. Jon padkreśliŭ, što Pakistan, jaki znachodzicca ŭ stanie pavyšanaj bajavoj hatoŭnaści, razhladaje mahčymaść prymianieńnia jadziernaj zbroi ŭ vypadku ŭźniknieńnia «pahrozy isnavańniu dziaržavy».

«My paviedamili pra situacyju našym siabram u Piersidskim zalivie i Kitai, a taksama prainfarmavali Vialikabrytaniju, ZŠA i inšyja krainy», — udakładniŭ Asif.

Pavodle jaho, niekatoryja dziaržavy Piersidskaha zaliva ŭžo pačali pieramovy z abodvuma bakami kanfliktu, adnak kankretnyja krainy jon nie nazvaŭ.

Abvastreńnie pakistanska-indyjskich adnosin pačałosia paśla taho, jak 22 krasavika 26 čałaviek zahinuli i 17 atrymali ranieńni ŭ vyniku napadu nieviadomych bajevikoŭ u kantralujemaj Ńju-Deli častcy štata Kašmir minułaha aŭtorka. Indyja ŭskłała adkaznaść za napad na Pakistan, abviaściŭšy jaho aktam teraryzmu. U toj ža čas Pakistan ličyć, što heta sama Indyja arhanizavała napad «pad čužym ściaham», kab mieć začepku dla napadu na Pakistan.

Kamientary da artykuła