Hrodzieniec znajšoŭ redkija zdymki horada časoŭ Pieršaj suśvietnaj vajny

Hrodzienski krajaznaŭca Alaksandr Pierahudaŭ znajšoŭ u rasijskich fondach šerah małaviadomych zdymkaŭ Hrodna časoŭ Pieršaj suśvietnaj vajny. Siarod zdymkaŭ u tym liku naviedvańnie carskaj siamjoj hrodzienskaha špitala, piša Hrodna.life.

Zdymki znajšlisia ŭ Centralnym dziaržaŭnym archivie kinafotadakumientaŭ Sankt-Pieciarburha. U Pierahudava atrymałasia znajści albom dabračynnaha sanitarnaha atrada Hrodzienskaj krepaści, a taksama asobnyja kartki z albomaŭ «Impierator Nikołaj II i jeho sieḿja» i «Upravlenije Sieviero-Zapadnych žieleznych doroh».

Krajaznaŭca miarkuje, što albom padrychtavali z nahody vizitu carskaj siamji ŭ Hrodna ŭ 1914 hodzie. Tady padčas pajezdki Mikałaja II na hrodzienskija farty vialikija kniažny Volha i Taćciana naviedali špital dabračynnaha sanitarnaha atradu Hrodzienskaj krepaści.

«Asablivuju kaštoŭnaść dla krajaznaŭcaŭ majuć zdymki interjeraŭ špitalu, raźmieščanaha ŭ budynku byłoha banka. Bolšaść kadraŭ idealizavanyja i majuć pastanovačnuju kampazicyju, adnak častkova zachavali sapraŭdnuju pracoŭnuju abstanoŭku i bahatyja na cikavyja drobiazi. Naprykład, u pakoi nad łožkam vajskoŭca možna zaŭvažyć mapu tahačasnych jeŭrapiejskich impieryj albo adnolkavyja padarunkavyja paštoŭki ŭ rukach paranienych.

Hrupa vajskoŭcaŭ kala ešałonaŭ z paranienymi, jakija prybyli z frontu

Paranienyja i siostry miłasernaści padčas słužby, jakaja pravodzicca śviatarom u adnoj z pałat špitala

Sanitarnaja mašyna kala adździaleńnia Sialanskaha paziamielnaha banka, dzie byŭ uładkavany špital

Hrupa paranienych u pałacie špitala

Siostry miłasernaści ŭ viestybiuli špitala ŭ čakańni paranienych

Siostry miłasernaści, paranieny i słužboviec špitala ŭ kabiniecie hałoŭnaha doktara špitala

Hrupa paranienych u pałacie špitala

Hrupa sanitaraŭ unosić paranienych u budynak špitala

Doktar i siostry miłasernaści kala łožka paranienaha ŭ pałacie špitala

Zdymki Mikałaja II nie majuć detalaŭ, jakija b dazvolili łakalizavać miesca, adnak z tłumačalnych podpisaŭ vynikaje, što fotakartki byli zroblenyja majstram P. M. Hielhoram na čyhunačnym vakzale Hrodna padčas vizitu impieratara 1 listapada 1914 h.», — napisaŭ na svajoj fejsbuk-staroncy Pierahudaŭ.

Były bank, dzie ŭ čas vajny byŭ špital — heta budynak na siońniašniaj vulicy Lenina, 9. Ciapier tam znachodzicca štab armii. Fatohraf Hielhor byŭ pradstaŭnikom dynastyi hrodzienskich fatohrafaŭ, jakaja pracavała ŭ horadzie niekalki dziesiacihodździaŭ z 1896 hoda da kanca 1930-ch.

Budynak hrodzienskaha špitala ŭ 1914 hodzie

Sučasny vyhlad taho samaha budynka

Kamientary da artykuła