Va ŭradzie nazvali datu, kali biełarusam daviadziecca na 100% apłačvać žyllova-kamunalnyja pasłuhi

Saviet Ministraŭ Biełarusi abjaviŭ terminy poŭnaha pierachodu na apłatu žyllova-kamunalnych pasłuh (ŽKP) pa 100%-ch taryfach. Pra heta havorycca ŭ pastanovie №254 ad 8 maja, jakuju apublikavali na Nacyjanalnym pravavym internet-partale.

Fota ilustracyjnaje

Dakumient zaćviardžaje prahramu dziejnaści ŭrada na najbližejšuju piacihodku.

Zhodna z płanami ŭładaŭ, subsidyjavańnie ŭ śfiery žyllova-kamunalnaj haspadarki spynicca da 2029 hoda. Da taho času ŭrad płanuje damahčysia 100%-ha pakryćcia siaredniedziaržaŭnych vydatkaŭ pa ŽKP, vyklučajučy ciepłazabieśpiačeńnie i padahreŭ vady. Pry hetym nie mienš za 60% srodkaŭ ad płanavych pavyšeńniaŭ płaciažoŭ za ŽKP nakirujuć na pavyšeńnie taryfu na ciepłavuju enierhiju.

Taryfy na ŽKP u 2026-2029 hadach buduć pierahladać raz na 3 miesiacy, uličvajučy rost dachodaŭ nasielnictva. Akramia taho, užo ŭ 2026 hodzie biełarusaŭ čakajuć novaŭviadzieńni pa apłacie pasłuh — ułady daručyli Ministerstvu žyllova-kamunalnaj haspadarki, Ministerstvu enierhietyki i Ministerstvu antymanapolnaha rehulavańnia i handlu raspracavać normy spažyvańnia asobnych pasłuh dla nasielnictva. Miarkujecca, što heta dazvolić ukaranić dyfierencyjavanyja taryfy, asabliva dla tych, chto pieravyšaje ŭstanoŭlenyja normy.

Raniej ciaham doŭhich hadoŭ dziaržava dapamahała apłačvać biełarusam kamunalnyja pasłuhi, pakryvajučy častku vydatkaŭ ź biudžetu. Adnak u apošnija hady ŭrad maje namier pamienšyć dziaržpadtrymku, kab žychary sami całkam apłačvali ŽKP.

Kamientary da artykuła