Tramp paviedamiŭ, što ŭ paniadziełak budzie havaryć z Pucinym

Prezident ZŠA Donald Tramp u svajoj sacyjalnaj sietcy Truth Social anansavaŭ, što ŭ paniadziełak, 19 traŭnia, zrobić niekalki telefonnych zvankoŭ. Pieršaj, u 10:00 (17:00 pavodle minskaha času) budzie razmova z prezidentam Rasii Uładzimiram Pucinym.

Donald Tramp. Fota: Joe Raedle / Getty Images

Paśla razmovy z Uładzimiram Pucinym Donald Tramp płanuje pahutaryć z ukrainskim prezidentam Uładzimiram Zialenskim. Da razmovy Trampa i Zialenskaha paśla buduć dałučanyja «roznyja členy NATO».

«Spadziajusia, što heta budzie praduktyŭny dzień, adbudziecca spynieńnie ahniu», — dadaŭ prezident ZŠA ŭ publikacyi ŭ sacsietcy TruthSocial.

Za niekalki hadzin da taho MZS Rasii paviedamiła, što dziaržsakratar ZŠA Marka Rubia patelefanavaŭ ministru zamiežnych spraŭ Rasii Siarhieju Łaŭrovu, kab abmierkavać rasiejska-ŭkrainskija pieramovy. Rubia, maŭlaŭ, «vitaŭ» dasiahnutyja damoŭlenaści pa bujnym rasijska-ŭkrainskim abmienie vajennapałonnymi ŭ farmacie 1000 na 1000. Spadabałasia Rubia i damoŭlenaść sfarmulavać svaje pryncypy spynieńnia ahniu na papiery kožnaj z bakoŭ, jakija zatym možna budzie abmierkavać u pošukach doŭhaterminovaha ŭrehulavańnia kanfliktu.

Łaŭroŭ, jak havorycca ŭ spravazdačy MZS RF, padziakavaŭ ZŠA za «kanstruktyŭnuju rolu» ŭ arhanizacyi praviedzienaha raŭnda pieršych za try hady pramych pieramoŭ z Kijevam.

Kamientary da artykuła