Amierykanski «Forbs» vyjšaŭ ź biełarusam na vokładcy

Ihar Tulčynski razam z baćkami emihravaŭ u ZŠA ŭ 11 hadoŭ. Ciapier jon miljarder, jaki handluje… vahańniami na hałoŭnaj biržy śvietu.

«Ihar Tulčynski zrabiŭ miljardny kapitał, vykarystoŭvajučy ałharytmy, kab pierajhrać žyvych trejdaraŭ. Siońnia jon stavić na vialikija moŭnyja madeli, kab zrabić svoj chiedž-fond jašče bolš razumnym», — tak charaktaryzuje ŭradženca Minska Džon Chajat (John Hyatt) — aŭtar artykuła ŭ Forbes, jaki ŭziaŭ u jaho intervju.

Ad Minska da Uoł-stryt: pačatak šlachu

Tulčynski naradziŭsia ŭ 1966 hodzie ŭ Minsku ŭ siamji muzykaŭ. U 1977 hodzie, kali Iharu było 11, baćki vyrašyli emihravać. Spačatku siamja praviała try miesiacy ŭ Italii, čakajučy status biežancaŭ, a zatym pierajechała ŭ ZŠA, dzie za šeść hadoŭ pamianiała čatyry štaty. Hety vopyt, pavodle słoŭ Tulčynskaha, navučyŭ jaho nie bajacca pieramien i adaptavacca da ich.

Zachopleny kampjutarami ź dziacinstva, Ihar užo ŭ 17 hadoŭ pisaŭ videahulni. Atrymaŭšy dypłomy bakałaŭra i mahistra pa kampjutarnych navukach u Techaskim univiersitecie, a zatym MBA pa finansach i pradprymalnictvie va Uortanskaj škole, Tulčynski pačaŭ pracavać u bujnym daśledčym centry ŭ halinie telekamunikacyj, elektronnych i kampjutarnych sistem AT&T Bell Labs, a potym pierajšoŭ u trejdynhavuju firmu Timber Hill, zasnavanuju Tomasam Piterfi, budučym miljarderam i zasnavalnikam adnoj z najbujniejšych biržavych płatformaŭ u śviecie Interactive Brokers.

U 1995 hodzie Tulčynski dałučyŭsia da Millennium Management — adnaho z najbujniejšych chiedž-fondaŭ u ZŠA, zasnavanaha Izraelem Inhłanderam.

Tam jon vyznačyŭsia jak ekśpiert u handli pa statystyčnych ałharytmach (stratehija «statystyčny arbitraž»). U pačatku 2000-ch jon pačaŭ abmiarkoŭvać ź Inhłanderam ideju ŭłasnaj kampanii ŭ miežach Millennium, što skončyłasia zasnavańniem u 2007 hodzie chiedž-fonda WorldQuant.

Ale pačatak byŭ ciažkim: praz 7 miesiacaŭ paśla adkryćcia na rynku adbyŭsia kryzis chiedž-fondaŭ. Tulčynski śćviardžaje, što svoječasova vyvieŭ hrošy z rynku, što dazvoliła paźbiehnuć najhoršaha.

Hłabalnaja sietka i palavańnie na talenty

Paśla adnaŭleńnia fond pačaŭ hłabalnuju ekspansiju. Pieršy mižnarodny ofis adkryŭsia ŭ Kitai, dzie z tysiačy kandydataŭ jon naniaŭ pieciarych. Ciapier u WorldQuant pracujuć 1000 čałaviek u 27 haradach 16 krain — ad Łondana da Vjetnama.

Jak i ŭsie «kvanty», Tulčynski piša ałharytmy, jakija aŭtamatyčna ździajśniajuć ździełki na biržach, vykarystoŭvajučy cenavyja sihnały.

Śpiecyjalizacyja WorldQuant — statystyčny arbitraž: heta handal na drobnych razychodžańniach cenaŭ pamiž roznymi akcyjami abo partfielami. Hetyja ałharytmy (abo «alfy») dazvalajuć adkryvać doŭhija i karotkija pazicyi, a taksama prymianiać składanyja stratehii, detali jakich nie raskryvajucca.

«My handlujem rabiznoj, a nie chvalami», — kaža jon.

Ciapier Tulčynski choča «paskoryć fabryku alfaŭ» z dapamohaj štučnaha intelektu (ŠI), kab stvarać novyja i bolš efiektyŭnyja handlovyja madeli. Choć ŠI i raniej prymianiaŭsia ŭ fondzie — dla analizu, prahnozaŭ i napisańnia koda — vykarystańnie vialikich moŭnych madelaŭ (LLM) mienavita dla hienieracyi stratehij źjaŭlajecca navinkaj. U spravazdačy Sienata ZŠA pa vykarystańni ŠI ŭ chiedž-fondach jany zhadvajucca ŭsiaho adzin raz.

WorldQuant, dzie pracujuć bolš za 150 kandydataŭ navuk (PhD) u halinie matematyki, IT i sumiežnych dyscyplin, dobra padrychtavany da ŭkaranieńnia takich rašeńniaŭ. Pa słovach Tulčynskaha, jany mohuć navučać LLM na ŭłasnych danych i ałharytmach, kab taja pisała novyja stratehii i dapamahała vyrašać składanyja zadačy. Pakul prajekt na rańniaj stadyi, ale ŭžo aktyŭna raspracoŭvajecca.

Jak adznačaje vydańnie, «Tulčynski pieratvaryŭ svaju šmathadovuju apantanaść danymi ŭ załatuju žyłu Uoł-stryt».

Vałodajučy WorldQuant, jon kiruje $10 miljardami ad fondu Millennium Management. Akramia taho, asobnaja sumiesnaja struktura ź miljarderam Inhładeram WorldQuant Millennium Advisors kiruje jašče $13 miljardami.

Jahonaja asabistaja majomaść aceńvajecca ŭ $1,7 miljarda.

Aproč biznesu, Tulčynski aktyŭna zajmajecca dabračynnaściu: z 2013 pa 2023 hod jon ukłaŭ $65 miljonaŭ u svoj fond. Hałoŭny prajekt — WorldQuant University, biaspłatny anłajn-univiersitet, zasnavany ŭ 2014 hodzie, jaki prapanuje mahistraturu pa finansavaj inžynieryi i inšych STEM-kirunkach. Taksama jon inviestavaŭ u bolš za 100 startapaŭ i napisaŭ try knihi pra inviestycyi. Ciapier pracuje nad čaćviortaj — pra toje, jak pravilna skaračać straty.

Jak piša žurnalist, u kancy razmovy Tulčynski ź ironijaj adznačaje: «Ujavicie sabie, ja niadaŭna hladzieŭ na Biełaruś praz Google Earth — tam nibyta ničoha nie źmianiłasia za 50 hadoŭ». I z hetymi słovami vychodzić z kabinieta.

Kamientary da artykuła