«Ščaślivaja, što advažyłasia na śvińniu, a nie naradzić druhoje dzicia». Biełaruska haduje mini-piha i nie moža naradavacca
Dyzajnierka draŭlanych sumačak Kryścina Levina ź miesiac tamu zaviała sabie ŭ kvatery mini-piha — dziaŭčynku, jakuju jany z synam nazvali Karycaj. Ciapier u svaim błohu jana padrabiazna dzielicca ŭsimi etapami staleńnia i vychavańnia dekaratyŭnaj śvinki. «Navučyć jaje za dva tydni chadzić kakać i sikać na pialušku akazałasia praściej, čym majho syna za siem hadoŭ nie apyrskvać svaim žoŭtym strumieniem plitku ŭ tualecie», — iranična zaŭvažaje žančyna.
Kryścina i Karyca. Skrynšot: tyktok @kristinka_levina
Kryścina Levina žyvie ŭ Minsku. Z 2014 hoda jana zajmajecca stvareńniem draŭlanych sumačak z ručnym rośpisam. U adnym ź videa jana prezientuje siabie jak «34-hadovaja maci-adzinočka z kvateraj u ipateku i mašynaj u lizinh. Vyrašyła nie naradžać druhoje dzicia, a zavieści śvinku. I ja ščaślivaja, što advažyłasia na śvińniu, a nie na dzicia».
Pa słovach Kryściny, ad śvińni zusim nie pachnie, u adroźnieńnie ad sabak, i myć jaje praściej.
«Jana pachnie čałaviekam, łokciem. Lepš, čym katy i sabaki vašy. U jaje žorstkaja poŭść, i jaje myć — adno zadavalnieńnie. Pachnie ad śviniej u chlavie, jakija pad siabie ssuć, a maja kvatera — nie chleŭ, z majoj padłohi možna jeści. Kali ž vyvodzić śvinku na vulicu na traŭku, to svaje spravy jana robić u pieršyja try siekundy, i tut ža biažyć dadomu. Jana ŭžo viedaje darohu da kvatery».
Kryścina i Karyca. Skrynšot: tyktok @kristinka_levina
Dadatkovy plus śvinki — jana śpić usiu noč, nie pračynajučysia i, prynamsi pakul, ničoha nie hryzie. Tolki moža pasmaktać niekatoryja rečy — naprykład, šnurki ad krasovak.
Kryścina raskazvaje, što kormić Karycu małočnymi i biezmałočnymi kašami, a taksama daje dziciačaje piure z harodniny i fruktaŭ. Nieŭzabavie haspadynia płanuje pryvučać mini-piha i da syroj harodniny, ale pakul u žyvioły niama na toje zuboŭ: jany vielmi maleńkija i miakkija.
Niadaŭna Kryścina nabyła dla Karycy kłubnicy, jakija śvinka kaštavała ŭpieršyniu. Spojler: joj spadabałasia.
Što tyčycca hukaŭ, jakija vydaje Karyca, najbolš hučnyja jany pierad padačaj ježy: śvinka pačynaje vielmi hučna viskatać, kali nie ŭ stanie dačakacca prysmakaŭ.
Abyšoŭsia mini-pih siamji ŭ 500 jeŭra. Nabyvali Karycu ŭ śpiecyjalnym pitomniku ŭ Rasii. Dekaratyŭnyja śvinki rastuć da troch-piaci hadoŭ i ŭ zaležnaści ad parody i dyjety mohuć dasiahnuć 30-70 kiłahramaŭ vahi.
Čytajcie taksama:
Kobrynski błohier pakazaŭ, jak vyrablajucca lehiendarnyja «Miasnyja padušački»
Ažanilisia błohier Mikita Miełkazioraŭ i niu-madel Lina Capava