Ź Minska zapuskajuć aŭtobus u Sočy. Treścisia 34 hadziny
Z 26 červienia ź Minska ŭ rasijski Sočy možna budzie dabracca na pramym aŭtobusie. Pra heta raskazali pradstaŭniki servisu pa prodažy biletaŭ «Atłas» Office Life.
Fota: Pexels
U zvarotnym napramku aŭtobus źjavicca ŭ raskładzie z 28 červienia. Rejsy zapłanavany kožnyja čatyry dni.
Daroha ź Minska da čarnamorskaha ŭźbiarežža Sočy zojmie kala 34 hadzin. Pa šlachu praduhledžany prypynki i ŭ inšych kurortnych miescach — Džubha, Lermantava, Novamichajłaŭski, Olhinka, Tuapse, Łazaraŭskaje.
U Biełarusi aŭtobus zajazdžaje ŭ Babrujsk, Žłobin i Homiel, a ŭ Rasii jon idzie praz Bransk, Varoniež, Rastoŭ-na-Donie, Krasnadar.
Bilet ź Minska ŭ Sočy abydziecca ŭ 362 rubli, da Tuapse i inšych kurortaŭ — u 304 rubli.