Prync Reza Piechlevi vystupiŭ ź videazvarotam da naroda Irana, zaklikaŭ da paŭstańnia

Spadčyńnik šachskaj dynastyi zajaviŭ, što «režymny aparat padaŭleńnia režymu» rassypajecca.

Demanstracyja iranskich emihrantaŭ u Rymie z partretami Rezy Piechlevi. Fota: Andrea Ronchini/NurPhoto via Getty Images

Prync Reza Piechlevi vystupiŭ ź videazvarotam da naroda Irana. Jon zajaviŭ, što Isłamskaj Respublicy nadychodzić kaniec, a Chamieniei «jak myš, schavaŭsia ŭ padziamielnym bunkiery». Jon miarkuje, što «režymny aparat padaŭleńnia» razburajecca. Naščadak kolišniaha iranskaha šacha zaklikaŭ narod «pakłaści kaniec Isłamskaj Respublicy praz narodnaje paŭstańnie».

Prync Piechlevi miarkuje, što «toje, što pačałosia, niezvarotna». «Budučynia śvietłaja, i my razam projdziem hety kruty pavarot historyi», — skazaŭ jon.

Jon taksama skazaŭ, što ŭ hetyja ciažkija dni jaho «serca z usimi biezabaronnymi hramadzianami, jakija paciarpieli i stali achviarami vajaŭničaści i iluzij Chamieniei».

Na dumku Piechlevi, «kaniec Isłamskaj Respubliki — heta kaniec jaje 46-hadovaj vajny ź iranskaj nacyjaj». 

Prync Piechlevi padkreśliŭ, što «nie varta pieražyvać pra zaŭtrašni dzień paśla padzieńnia Isłamskaj Respubliki». «Iran nie budzie pakutavać ad hramadzianskaj vajny i niestabilnaści. U nas jość płan dla budučyni Irana i jaho roskvitu. My hatovyja da pieršych sta dzion paśla padzieńnia, pierachodnaha pieryjadu i ŭstalavańnia nacyjanalnaha i demakratyčnaha ŭrada dla iranskaj nacyi i rukami iranskaj nacyi».

64-hadovy Reza Kir Piechlevi — starejšy syn apošniaha iranskaha šacha Machamieda Rezy Piechlevi, zrynutaha Isłamskaj revalucyjaj 1979 hoda. Paśla śmierci baćki ŭ 1980 hodzie jon ličycca hałoŭnaj asobaj iranskaha manaršaha doma ŭ emihracyi. Ciapier jon žyvie ŭ ZŠA.

Kamientary da artykuła