Z zajavy pa vynikach samitu NATA vyklučyli krytyku Rasii i abiacańnie pryniać u aljans Ukrainu

Na samicie NATA, jaki prajšoŭ u niderłandskaj Haazie 24—25 červienia, krainy-ŭdzielnicy nie ŭklučyli ŭ vynikovuju zajavu rezkuju krytyku Rasii i nie paćvierdzili abiacańnie pryniać Ukrainu ŭ aljans. Jak paviedamlaje The Telegraph, sioleta tekst zajavy značna karaciejšy, čym u 2024 hodzie: u im usiaho kala 400 słoŭ, i Rasija zhadvajecca tolki adzin raz, a Ukraina — dvojčy.

Padčas samita NATA ŭ Haazie. Fota: Haiyun Jiang-Pool/Getty Images

U zajavie havorycca, što krainy NATA praciahvajuć padtrymlivać Ukrainu, bo jaje biaśpieka važnaja i dla ich. Dla hetaha aljans uličyć pramuju dapamohu abarončaj pramysłovaści Ukrainy jak častku ahulnych vydatkaŭ na abaronu.

Rasiju zhadvajuć tolki ŭ kantekście pahroz, jakija stajać pierad NATA. Tam padkreślivajecca, što Rasija ŭjaŭlaje doŭhaterminovuju niebiaśpieku dla jeŭraatłantyčnaj biaśpieki, tamu členy aljansu buduć vydzialać nie mienš za 5% VUP na abaronu.

Dla paraŭnańnia: u minułahodniaj zajavie NATA adkryta abvinavačvała Rasiju ŭ poŭnamaštabnym uvarvańni va Ukrainu i zajaŭlała, što budučynia Ukrainy — u NATA.

The Telegraph adznačaje, što sioletniuju zajavu zrabili bolš karotkaj i strymanaj, kab zasiarodzicca na hałoŭnym pytańni dla Donalda Trampa — finansavych vydatkach na abaronu. ZŠA patrabujuć, kab jeŭrapiejskija krainy pavialičyli hetyja vydatki da 5% VUP.

Taksama paviedamlajecca, što Tramp nie padtrymaŭ bolš žorstkuju farmuloŭku, jakuju prasiŭ uklučyć prezident Ukrainy Uładzimir Zialenski, bo baicca, što heta pieraškodzić jaho mahčymym pieramovam z Pucinym pra mirnaje ŭrehulavańnie.

Kamientary da artykuła