Pjany kiroŭca-biełarus u Polščy źbiŭ dźviuch žančyn i ŭciok ź miesca zdareńnia

U Polščy zdaryłasia trahičnaje DTZ z udziełam 31-hadovaha hramadzianina Biełarusi, paviedamlaje Most.

U niadzielu, 29 červienia, kala vioski Jarnataŭ u Lubušskim vajavodstvie hramadzianin Biełarusi, kirujučy aŭtamabilem Mazda u niećviarozym stanie, nie spraviŭsia z kiravańniem, źjechaŭ z darohi, źnios darožny znak i źbiŭ dźviuch žančyn — 59-hadovuju maci i 24-hadovuju dačku, što stajali pobač sa svaim domam.

Starejšaja žančyna zahinuła na miescy, a małodšuju ŭ ciažkim stanie dastavili ŭ balnicu viertalotam. Pavodle miedykaŭ, aŭtamabil navat praciahnuŭ dziaŭčynu niekatory čas paśla najezdu.

Paciarpiełaja žančyna ciapier znachodzicca ŭ artapiedyčnym adździaleńni balnicy ŭ Hožavie. U jaje pierałomy i rany, ale stan aceńvajecca jak stabilny. Siamji akazvajuć psichałahičnuju padtrymku.

Biełarus uciok ź miesca avaryi. Vysačyć jaho dapamahli śviedki: muž i žonka, jakija jechali toj ža darohaj i zaŭvažyli aŭto z paškodžanym škłom. Jany paviedamili pra heta ŭ palicyju i pieradavali danyja pra jaho miescaznachodžańnie.

Mienš čym praz 20 chvilin paśla zdareńnia palicyja zatrymała kiroŭcu. Jon sprabavaŭ uciačy piechatoj, ale jaho zatrymali. Jak vyśvietliłasia, u kryvi mužčyny było amal 1,5 pramile ałkaholu, z-za mocnaha apjanieńnia jon nie moh adkazvać na pytańni. Papiarednija śledčyja dziejańni adkłali da taho času, pakul jon praćvierazieje.

Kamientary da artykuła