Polšča pryznała Alaksandra Mašenskaha niepažadanaj asobaj

Adpaviednaje rašeńnie siońnia było apublikavana na sajcie Ministerstva ŭnutranych spraŭ i administracyi Polščy.

Alaksandr Mašenski

Varšava paličyła biełaruskaha multymiljaniera Alaksandra Mašenskaha niepažadanaj asobaj i ŭniesła jaho ŭ sankcyjnyja śpisy.

U dačynieńni da Alaksandra Mašenskaha prymianiajucca nastupnyja miery:

• Zamarožvańnie finansavych srodkaŭ i majomaści, jakaja jamu naležyć ci znachodzicca pad jaho kantrolem.
• Zabaraniajecca pieradavać jamu finansy ci ekanamičnyja resursy (naŭprost ci ŭskosna).
• Zabarona na ŭdzieł u lubych schiemach, što abychodziać hetyja abmiežavańni.
• Vyklučeńnie z udziełu ŭ dziaržaŭnych zakupkach i konkursach u Polščy.
• Uniasieńnie ŭ śpis inšaziemcaŭ, čyjo znachodžańnie ŭ Polščy ličycca niepažadanym.

U arhumientacyi rašeńnia adznačajecca, što Alaksandr Mašenski maje ciesnyja asabistyja, palityčnyja i dziełavyja suviazi z Alaksandram Łukašenkam. Jon źjaŭlajecca kiraŭnikom bujnoj kampanii «Santa-Bremar», jakaja atrymlivaje asablivyja lhoty ad biełaruskaha ŭrada i zajmajecca handlem z Rasijaj. Mašenski taksama źviazany z małočnaj pramysłovaściu praz kampaniju «Savuškin pradukt», jakaja maje dostup da dziaržaŭnych resursaŭ i pradpryjemstvaŭ.

Polskija ŭłady źviartajuć uvahu, što jon padtrymlivaŭ Łukašenku, u tym liku padčas vybaraŭ 2020 hoda i ŭdzielničaŭ u «tajemnaj inaŭhuracyi». Byŭ uznaharodžany ordenam, uvachodzić u blizkaje koła Łukašenki i karystaŭsia dziaržaŭnymi samalotami bolš za 30 razoŭ.

Usio heta, na dumku polskich uładaŭ, śviedčyć pra hłybokuju intehracyju Alaksandra Mašenskaha ŭ biełaruski aŭtarytarny režym. Tamu jaho znachodžańnie ŭ Polščy moža ŭjaŭlać pahrozu biaśpiecy dziaržavy, asabliva ŭ kantekście rasijskaj ahresii suprać Ukrainy i ŭdziełu Biełarusi ŭ padtrymcy hetych dziejańniaŭ.

U arhumientacyi zhadvajucca zasakrečanyja listy načalnika raźviedki i śpiecsłužbaŭ. U Mašenskaha jość 30 dzion na abskardžvańnie rašeńnia. 

Viadoma, što apošnija hady siamja biznesmiena žyła ŭ Varšavie, a sam jon rehularna da jaje jeździŭ.

Kamientary da artykuła