U Žyrovicach adnaŭlajuć baročnuju carkvu XVIII stahodździa. Ad aryhinalnaha pomnika pakinuli tolki piać brusoŭ
Prajekt «rekanstrukcyi» Hieorhijeŭskaj carkvy Śviata-Uśpienskaha Žyrovickaha manastyra praduhledžvaŭ zachavańnie mienš jak pałovy zrubu, ale ŭ rečaisnaści ad staroha pomnika nie zastałosia amal ničoha.
Adbudova Hieorhijeŭskaj carkvy ŭ Žyrovicach z novaha brusa. Fota: telehram-kanał «Žizń Słonima Slonim LIVE»
Razychodžańnie z prajektam zaŭvažyŭ telehram-kanał «Spadčyna».
Rekanstrukcyja Hieorhijeŭskaj carkvy na miascovych mohiłkach, jakaja zvodzicca da taho, što jaje raźbirajuć da padmurkaŭ i źbirajuć nanova, pačałasia ŭ mai hetaha hoda, vyklikaŭšy šmat aściaroh, što heta čarhovy akt vandalizmu ad Ruskaj pravasłaŭnaj carkvy.
Jašče letaś z carkvy źniali ŭsiu šaloŭku, a na mohiłkach pavysiakali ŭsie drevy. Fota: sobory.ru
Prajekt, raspracavany «Hrodnahramadzianprajektam» pad kiraŭnictvam Aleny Sčasnaj, praduhledžvaŭ zachavańnie mienš čym pałovy zruba — tolki 40%. Całkam va ŭtyl śpisvajecca amal uvieś aŭtentyčny materyjał: krokviennaja sistema dachu, pierakryćci, kanstrukcyja kupała, šaloŭka, karnizy, adlivy, padłohi, leśvica.
Ciomnym koleram paznačany frahmienty zruba, jakija pavinny byli być całkam zamienieny novym brusam. Čarciož z prajektnaj dakumientacyi
Ale i ŭ vypadku sa zrubam była prypiska, što ŭ takim abjomie jaho zachavajuć tolki kali pry razborcy chrama raptam nie vyjaviacca «schavanyja defiekty» ŭ tych brusach, jakija chacieli paŭtorna vykarystać.
Ciapier, miarkujučy pa apošnich fotazdymkach, Hieorhijeŭskuju carkvu ŭźviali nanova na poŭnuju vyšyniu ścien i prystupili da krokviennaj sistemy dachu.
Ciomny vianiec uviersie zrubu apsidy — usio, što zachavali ad aryhinalnaj Hieorhijeŭskaj carkvy. Fota: telehram-kanał «Žizń Słonima Slonim LIVE»
Aktyvisty pabačyli, što pry adbudovie carkvy zamiest zajaŭlenaha ŭ prajekcie abjomu zachavali tolki piać starych brusoŭ u apsidnaj častcy carkvy — jany kantrasna vyłučajucca na fonie śvietłych novych brusoŭ.
Adbudova Hieorhijeŭskaj carkvy ŭ Žyrovicach z novaha brusa. Fota: telehram-kanał «Žizń Słonima Slonim LIVE»
Uźnikaje paradoks karabla Tesieja — kali ŭsie častki abjekta zamianić na novyja, ci zastajecca abjekt tym ža abjektam? Abo my nazaŭždy stracili jašče adzin pomnik baroka, uziaŭšysia jaho adnaŭlać?