Biełaruska stała finalistkaj konkursu opiernych śpievakoŭ u Italii
Biełaruska Albina Tonkich vyjšła ŭ finał 11-ha konkursu opiernych śpievakoŭ Concorso Lirico Internazionale di Portofino, jaki adbyŭsia ŭ Italii 21—27 lipienia, piša sajt «Biełaruś i śviet».
Albina Tonkich padčas finału. Skrynšot videa Youtube
U spabornictvach udzielničali 92 vykanaŭcy z 50 krain, adabranyja z 200 kandydataŭ. Paśla pieršaha tura i paŭfinału ŭ finał prajšli tolki 10 čałaviek.
Tut naša suajčyńnica, uładalnica saprana, vykanała dva tvory.
Pieršy — aryju Frančeski «O, nie płač, moj Paoła» z opiery Rachmaninava «Frančeska da Rymini», druhi — aryju Vijalety E Strano! Sempre Libera Degg'io z opiery Verdzi «Travijata».
Pieršuju premiju ŭ vyniku zavajavała kazaška Ajhieryma Ałtynbiek, druhuju — paŭdniovakarejec Džunchiok Fieliks Park, treciuju — rasijanka Lizavieta Šuvałava, čaćviortuju — italjanka Lučyja Tuminieli.
Usie finalisty, facebook.com
Konkurs CLIP, jaki prachodzić u kurortnym prymorskim haradku Partafina z 2015 hoda, pryzvany padtrymlivać maładych opiernych vakalistaŭ va ŭzroście ad 18 da 32 hadoŭ.
Jaho žury ŭznačalvaje francuz Daminik Miejer, jaki ŭ 2010—2020 hadach byŭ dyrektaram Vienskaj opiery, a ŭ 2020—2025 hadach — teatra opiery i baleta «Ła Skała».
Albina Tonkich naradziłasia ŭ Minsku, skončyła kaledž mastactvaŭ imia Achremčyka i BDAM.
U 2017 hodzie atrymała I premiju konkursu junych vakalistaŭ Kaunas Sonorum u Kaŭnasie, a ŭ 2023 hodzie — III premiju konkursu imia Čajkoŭskaha ŭ Sankt-Pieciarburhu.