Zafiksavanaja rekordnaja za apošni čas kolkaść rasijskich dronaŭ, jakija za noč zalacieli ŭ Biełaruś

Pry čarhovaj masiravanaj rasijskaj atacy Ukrainy ŭ noč na 31 lipienia, kali Rasija zapuściła bolš za 300 dronaŭ i 8 rakiet, pabity rekord apošnich miesiacaŭ pa zalaciełych za sutki ŭ Homielskuju vobłaść Biełarusi rasijskich BPŁA, piša «Fłahštok». Takuju vysnovu vydańnie zrabiła paśla vyvučeńnia źviestak ukrainskich manitorynhavych kanałaŭ.

Siłuet ŭdarnaha bieśpiłotnika Shahed. Ilustracyjnaje fota Aleksandr Gusev / PACIFIC P / SIPA

Pavodle padlikaŭ «Fłahštoka», ź viečara 30 lipienia zafiksavana jak minimum 26 vypadkaŭ zalotaŭ (pavodle źviestak telehram-kanała «Rynda manitoryć») u pavietranuju prastoru Biełarusi rasijskich BPŁA pry atacy terytoryi Ukrainy.

Pieršyja ŭvarvańni ŭ pavietranuju prastoru Homielskaj vobłaści adbylisia ŭviečary 30 lipienia, ale nie byli zafiksavanyja. Jość źviestki tolki pra vylet dronaŭ nazad na terytoryju Ukrainy kursam na Prypiać i na Čarnobyl.

Taksama byŭ zaŭvažany ruch BPŁA pa ŭkrainska-biełaruskaj miažy ŭ rajonie Oŭruča. Zatym, z 22:27 da 23:47, rasijskija drony fiksavalisia ŭ rajonie Naroŭli, Brahina, Mazyra i Łojeva.

Akramia taho, pa paviedamleńni čytačoŭ «Fłahštoka», charakterny šum ad pralotu dvuch BPŁA čuli na poŭdzień ad Homiela, ale dakładnych danych pra ich dalejšy kirunak niama. A ŭžo paśla poŭnačy čatyry bieśpiłotniki vyjšli z Homielskaj vobłaści ŭ napramku ŭkrainskich Čarnobyla i Narodzičaŭ.

Z ulikam usich rasijskich BPŁA, jakija zalacieli ŭ lipieni ŭ Biełaruś, pabity miesiačny rekord studzienia 2025 hoda — jak minimum 96 vypadkaŭ parušeńnia pavietranaj prastory Biełarusi praz Homielskuju i Bresckuju vobłaści.

Kolkaść zafiksavanych uvarvańniaŭ BPŁA ŭ pavietranuju prastoru Biełarusi praz ukrainska-biełaruskuju miažu ŭ studzieni-lipieni 2025 hoda

Raniej, u noč na 4 lipienia, «Fłahštok» fiksavaŭ 1 zalot, z 7 pa 13 lipienia — 61 vypadkaŭ, u noč na 21 lipienia — 3, u noč na 28 lipienia — 5 zalotaŭ.

Uvarvańni rasiejskich BPŁA, jakija zalacieli z terytoryi Ukrainy ŭ pavietranuju prastoru Biełarusi ŭ lipieni 2025 hoda (pavodle źviestak telehram-kanała «Rynda manitoryć»)

Kamientary da artykuła