Aryštavany viadomy nieŭrołah Rusłan Badamšyn. Jon byŭ na chatniaj chimii
Ad miedyka nie chočuć adčapicca ŭžo piaty hod.
Rusłan Badamšyn
Viadomy nieŭrołah Rusłan Badamšyn aryštavany, jon znachodzicca ŭ SIZA №1 pa abvinavačvańni ŭ «sadziejničańni ekstremisckaj dziejnaści» (artykuł 361-4 Kryminalnaha kodeksa).
Da momantu źniavoleńnia Badamšyn znachodziŭsia pad chatniaj chimijaj. U mai 2024 hoda jon byŭ prysudžany da troch hadoŭ abmiežavańnia svabody za ŭdzieł u pratestach.
Na praciahu 2020-2021 nieŭrołaha kidali na sutki minimum piać razoŭ, ahułam jon pravioŭ za kratami pa administratyŭkach niekalki miesiacaŭ. Časam siłaviki Badamšyna zabirali prosta z pracy — z RNPC nieŭrałohii i niejrachirurhii, dzie jon byŭ doktaram funkcyjanalnaj dyjahnostyki.
Rusłan Badamšyn
Rusłan Badamšyn śpiecyjalizavaŭsia na spadčynnych i nabytych niejramyšačnych zachvorvańniach, u tym liku SMA. Doktar maje 16 hadoŭ stažu.
Na sajcie 103.by pacyjenty acanili jaho maksimalna vysoka:
- Chaču vykazać udziačnaść Badamšynu R. R. (nieŭrołahu). Daskanała i ŭvažliva vyvučyŭ historyju chvaroby, dakładna pravioŭ abśledavańnie i pryznačyŭ nieabchodnaje lačeńnie. Pryjazny i hramatny śpiecyjalist, prafiesijanał svajoj spravy.
- Paśla vizitu da nieŭrołaha, doktara Badamšyna Rusłana Rafaełaviča, chočacca vykazać udziačnaść za dobry, čuły i prafiesijny pryjom. Doktar byŭ vielmi ŭvažlivy i spahadlivy, adčuvałasia ščyraje žadańnie dapamahčy. Vialiki dziakuj!
- Rusłan Rafaełavič — vialiki prafiesijanał! Znajšoŭ pryčynu bolu i dapamoh palepšyć jakaść žyćcia. Dziakuju jamu!
- Praceduru pravodziŭ Badamšyn R. R. Było vidać, što doktar choča dapamahčy i znajści pryčynu prablemy. Uražańni ad naviedvańnia centra — stanoŭčyja. Rekamienduju!
Apošni z vodhukaŭ datujecca majem 2025 hoda.
Žonku nieŭrołaha, Taćcianu Badamšynu (jana taksama miedyk, endakrynołah), taksama sudzili pa kryminalnaj spravie za ŭdzieł u pratestach.