U dronie, jaki zalacieŭ ź Biełarusi ŭ Litvu, było vybuchovaje prystasavańnie

Na minułym tydni na vajskovym palihonie ŭ Litvie ŭpaŭ bieśpiłotnik, jaki pierad tym zalacieŭ z terytoryi Biełarusi i pralacieŭ navat nad stalicaj krainy Vilniaj. Jak paviedamili 5 žniŭnia litoŭskija ŭłady, unutry aparata znachodziłasia vybuchovaje prystasavańnie, piša LRT.

Znojdzieny dron. Pa papiarednich źviestkach heta «Hierbiera». Fota: fejsbuk ministarki abarony Litvy Davile Šakalenie

Pa słovach hienieralnaj prakurorki Litvy Nidy Hrunskienie, vybuchoŭka była znojdzienaja i biaśpiečna abiasškodžanaja śpiecyjalistami Uzbrojenych sił Litvy.

Načalnik štaba Litoŭskich pavietranych sił pałkoŭnik Dajnius Paškiavičus adznačyŭ, što ŭnutry bieśpiłotnika było kala dvuch kiłahramaŭ vybuchovaha rečyva. Dla paraŭnańnia, drony typu Shahed mohuć nieści da 50 kh vybuchoŭki.

Paśla abiasškodžvańnia dron razabrali, a jahonyja častki adpravili na sudova-techničnuju ekśpiertyzu.

Dron upaŭ u rajonie vajskovaha palihona Hajžuny ŭ Janaŭskim rajonie Litvy. Heta adbyłosia 28 lipienia, ale znajšli bieśpiłotnik tolki praz čatyry dni — 1 žniŭnia.

Heta ŭžo druhi padobny vypadak za apošnija tydni. 10 lipienia jašče adzin dron, madeli Gerbera, taksama pierasiok miažu z boku Biełarusi. Pavodle słoŭ Nidy Hrunskienie, jość padstavy mierkavać, što i apošni dron moža być toj ža madeli.

Uzbrojenyja siły Litvy padazrajuć, što hetyja drony mohuć być źviazanyja z rasijskimi apieracyjami i byli źbityja z kursu ŭkrainskimi sistemami radyjoelektronnaj baraćby, kali nakiroŭvalisia ŭ bok Ukrainy. Ale rasśledavańnie praciahvajecca i inšyja viersii taksama nie adkidvajucca.

Incydenty vyklikali tryvohu ŭ Litvie adnosna biaśpieki pavietranaj prastory krainy.

Kamientary da artykuła