Śpiecsłužby rassyłajuć fejkavyja paviedamleńni pra apłatu ŭdziełu ŭ mitynhach. Kupiŭsia tolki błohier Virus i jahonyja siabry
Siońnia ŭ čatach pošuku pracy ŭ Vilni masava rassyłali paviedamleńni ad imia byłoj palitźniavolenaj Aleny Dziadziuli. U ich, byccam, jana prapanavała hrošy za ŭdzieł u akcyi pratestu kala ambasady Biełarusi ŭ Vilni. Na fejk amal nichto nie pavioŭsia.
Alena Dziadziula. Fota «Našaj Nivy»
Paviedamleńni masava rassyłalisia pa čatach, dzie ludzi šukajuć pracu ŭ Vilni i Litvie. Akaŭnt mimikruje pad sapraŭdny akaŭnt byłoj palitźniavolenaj Aleny Dziadziuli.
Tekst paviedamleńnia taki: «Padpracoŭka ŭ Vilni — 50 jeŭra za hadzinu. Treba pryjści ŭ luby čas z 14 da 22 da 8 žniŭnia, udzieł ad adnoj hadziny. Treba pastajać ź inšymi ŭdzielnikami ŭ masoŭcy, anijakich pramoŭ i łozunhaŭ».
Skrynšot paviedamleńnia ŭ adnym z čataŭ
U jakaści miesca prapanujecca ambasada Biełarusi ŭ Litvie, vulica Mindoŭha, 13 u Vilni. U hety ž čas i ŭ hetym miescy aktyvisty robiać akcyju ŭ padtrymku palitviaźniaŭ RE:BELARUS kala ambasady Biełarusi ŭ Litvie.
Akaŭnt, ź jakoha rassyłajucca paviedamleńni, vidavočna fejkavy (id7068617781) — mianiaŭ niekalki imionaŭ, ničoha nie pisaŭ i tolki manitoryŭ čaty vilenskaj emihracyi.
Historyja źmieny imionaŭ i čaty, dzie byŭ raniej zaŭvažany akaŭnt
Pieršym kupiŭsia na hetuju pravakacyju błohier «Dumać nie baluča» — Leanid Myšlenik, kolišni pradprymalnik z Bresta, jaki mocna paciarpieŭ padčas pratestaŭ u 2020-m hodzie i vyjechaŭ ź Biełarusi. Ciapier jon viadzie błoh, dzie zaciata krytykuje demakratyčnyja siły Biełarusi i asabliva Ofis Śviatłany Cichanoŭskaj.
Leanid Myšlenik. Skrynšot ź jahonaha videa
Myšlenik pravioŭ ułasnaje «rasśledavańnie» hetaj situacyi, dzie piša, što hetyja akcyi nikomu nie patrebnyja, a ludzi na ich chodziać tolki za hrošy. Zrabiŭ jon vysnovu i pra «niedavier ludziej da Ofisa», choć akcyi kala ambasady ź im anijakim čynam nie źviazanyja.
Častka «rasśledavańnia» Leanida Myšlenika
Adrazu paśla publikacyi jaje reposnuŭ błohier Vital «Virus» Kandracienka. Akramia ich dvuch, na pravakacyju nichto nie pavioŭsia.
{DONATE_PAYPAL}