U Polščy zatrymlivajuć biełarusaŭ, jakija skarystalisia z «iłžyvaha tranzitu»
Polskija pamiežniki zatrymlivajuć biełarusaŭ, što skarystalisia «iłžyvym tranzitam», i dastaŭlajuć u sud, jaki vyrašaje, ci buduć jany čakać vynikaŭ razhladu prośby ab mižnarodnaj abaronie ŭ zakrytym łahiery dla ŭciekačoŭ, paviedamiŭ vydańniu «Pozirk» pravaabaronca Raman Kiślak.
Fota ilustracyjnaje
«Praktyka pamiežnych orhanaŭ Polščy z kanca červienia źmianiłasia, — zajaviŭ surazmoŭca. — Biełarusy, jakija nie mieli vizy, karystalisia tak zvanym «iłžyvym tranzitam»: lacieli z adnoj biaźvizavaj krainy ŭ inšuju, a padčas tranzitu padavalisia ŭ Polščy na prytułak. Jak praviła, heta tyčycca vyletaŭ z Hruzii».
Najčaściej heta byli biełarusy, u jakich skančajecca termin dziejańnia pašparta i jakija nie mohuć atrymać vizu, udakładniŭ Kiślak. Raniej u Polščy ŭ takich biełaruskich hramadzian prymali zajavy pra nadańnie prytułku i, jak praviła, nie zatrymlivali.
«Ciapier usich zatrymlivajuć i dastaŭlajuć u sud, i sudździ ŭžo vyrašajuć — źmiaščać u zakryty łahier abo vyzvalać, tady čałaviek budzie čakać rašeńnia pa jaho spravie na voli. I niekalki čałaviek užo ŭ łahiery», — adznačyŭ pravaabaronca.
Ramanu Kiślaku viadoma pra čatyry takija vypadki z 24 červienia. Dvoje biełarusaŭ ciapier znachodziacca ŭ zakrytym łahiery dla mihrantaŭ, dvoje — na voli na padstavie rašeńnia suda.
«Orhany pamiežnaj achovy kažuć, što biełarusy instrumientalizujuć prava na prytułak», — padkreśliŭ surazmoŭca.
Čytajcie taksama:
U Polščy skasoŭvajuć terminy razhladu zajaŭ na mižnarodnuju abaronu