Sustreča Pucina i Trampa adbudziecca na vajskovaj bazie ZŠA na Alascy
15 žniŭnia ŭ Ankarydžy na Alascy projdzie samit prezidenta ZŠA Donalda Trampa i Uładzimira Pucina. Pavodle CNN, pieramovy adbuducca na Abjadnanaj vajskovaj bazie Ełmiendorf — Ryčardsan, bo tolki hetaja placoŭka zdoleła zadavolić patrabavańni Pucina pa biaśpiecy.
Na abjadnanaj bazie Elemiendorf-Ryčardsan (Alaska), 13 vieraśnia 2024 hoda. Fota: Airman 1st Class Hunter Hites / U.S Air Force via AP
Bieły dom pieršapačatkova imknuŭsia paźbiehnuć situacyi, kali rasijskaja delehacyja apyniecca na terytoryi amierykanskaha vajskovaha abjekta, ale inšych varyjantaŭ, jakija adpaviadali b umovam biaśpieki, u horadzie nie znajšli.
Detali samitu jašče kančatkova nie ŭzhodnieny. Dziaržsakratar ZŠA Marka Rubia i ministr zamiežnych spraŭ RF Siarhiej Łaŭroŭ užo abmierkavali «niekatoryja aśpiekty padrychtoŭki».
Tramp nazvaŭ sustreču «probnaj» i zajaviŭ, što choča asabista pahladzieć na Pucina, kab «acanić situacyju».
Vybar Alaski staŭ vynikam praciahłych kułuarnych pieramoŭ. Mahčymymi varyjantami razhladalisia Vienhryja i ZŠA. Rašeńnie ŭskładniałasia ordaram Mižnarodnaha kryminalnaha suda na aryšt Pucina. Tramp adznačyŭ, što ličyć važnym krokam hatoŭnaść Pucina pryjechać u ZŠA.
Siońnia Tramp praviadzie videakanfierencyju ź jeŭrapiejskimi lidarami i prezidentam Ukrainy Uładzimiram Zialenskim, a paśla — asobnuju sustreču ź jeŭrapiejskimi kiraŭnikami biez udziełu Kijeva. Pavodle źviestak Reuters, u ES isnujuć zaściarohi, što mahčymaja damoŭlenaść pamiž ZŠA i Rasijaj moža być «niespryjalnaj dla Jeŭropy i biaśpieki Ukrainy».
Čakajecca, što Zialenski nie prymie ŭdziełu ŭ samicie, tamu trochbakovy farmat pakul nie razhladajecca.
Častka pieramoŭ projdzie ŭ farmacie «sam-nasam» pamiž Trampam i Pucinym.