Jak śpiecsłužby ZŠA rychtujuć sustreču Trampa i Pucina na Alascy
Maršrut aŭtamabilaŭ Trampa i Pucina staranna płanujecca, kab jany nie pierasieklisia.
Rasijski samalot Ił-96 u mižnarodnym aeraporcie Ankorydža imia Teda Styviensa napiaredadni sustrečy prezidenta ZŠA Donalda Trampa i prezidenta Rasii Uładzimira Pucina ŭ Alascy, 15 žniŭnia 2025 hoda. Fota: Hasan Akbas/Anadolu via Getty Images
Dla sakretnaj słužby ZŠA padrychtoŭka sustrečy Donalda Trampa i Uładzimira Pucina na Alascy pieratvaryłasia ŭ «sapraŭdny sprynt», piša Bloomberg.
Pakolki treba adnačasova abaraniać amierykanskaha i rasijskaha prezidentaŭ z ulikam taho, što kožny ź ich z ułasnaj dobra ŭzbrojenaj achovaj, misija akazałasia nadzvyčaj składanaj.
U Ankorydž prybyli sotni ahientaŭ. Jany dziažurać na skryžavańniach, u kafe i na parkoŭkach.
Prablem dadaje hieahrafičnaje znachodžańnie Alaski. U Ankorydžy abmiežavana kolkaść haściničnych numaroŭ i prakatnych aŭtamabilaŭ, turystyčny siezon u razhary, tamu transpart i inšyja nieabchodnyja rečy zavoziać ź inšych rajonaŭ štata. Aŭtamabili dla kartežaŭ pierasyłajuć hruzavymi samalotami z kantynientalnaj častki ZŠA.
Sustreča Trampa i Pucina projdzie na vajennaj bazie Ełmiendorf-Ryčardsan — samaj bujnoj na Alascy.
Choć Ankorydž u minułym prymaŭ Papu Rymskaha i byłoha prezidenta ZŠA Ronalda Rejhana, ciapierašniaja sustreča — adna z najvialikšych padziej u historyi horada.
Pa słovach čynoŭnikaŭ Dziarždepu ZŠA, zhodna z pratakołam, u dvuchbakovych sustrečach najvyšejšaha ŭzroŭniu dziejničajuć praviły ŭzajemnaści: luby pryvilej, pradstaŭleny adnamu lidaru, varta zabiaśpiečyć i inšamu. Pramyja pieramiaščeńni Pucina budzie kantralavać rasijskaja achova. Sakretnaja słužba ZŠA budzie nazirać zvonku.
Usio budzie simietryčna — ad kartežu da rassadki pierakładčykaŭ u zale. Abodva baki pryviazuć svaich pierakładčykaŭ. Navat kolkaść i pamier pakojaŭ čakańnia (biaśpiečnych zon dla kožnaha z prezidentaŭ) uzhadniajucca asobna.
Maršrut aŭtamabilaŭ Trampa i Pucina staranna płanujecca, kab jany nie pierasieklisia i pry hetym była harantavana biaśpieka dla kožnaha.