Litoŭskaja partyja vyklučyła sa svaich šerahaŭ deputata, jaki zaklikaŭ prahnać ź Litvy Ofis Cichanoŭskaj

U piatnicu partyja «Nacyjanalnaje abjadnańnie» aficyjna abviaściła pra pryniataje rašeńnie vyklučyć deputata Siejma Vitaŭtasa Sinicu sa svaich šerahaŭ, paviedamlaje LRT.

Vitaŭtas Sinica. Fota: Sota

Vitaŭtas Sinica byŭ namieśnikam staršyni partyi «Nacyjanalnaje abjadnańnie». Jon zastavaŭsia adzinym pradstaŭnikom partyi ŭ Siejmie, atrymaŭšy mandat u adnamandatnaj akruzie.

Jak ukazvajecca ŭ zajavie partyi, Sinica byŭ vyklučany za toje, što nieadnarazova arhanizoŭvaŭ pasiadžeńni siabraŭ rady biez kvorumu i prymaŭ na ich rašeńni. Partyja taksama ŭzhadvaje i inšyja parušeńni, dapuščanyja im.

Sam palityk zajaviŭ, što heta rašeńnie źjaŭlajecca niesapraŭdnym i jurydyčna nikčemnym.

«Hrupa, jakaja maje bolšaść u praŭleńni (Nacyjanalnaha abjadnańnia), ja vieru, sapraŭdy pryniała takoje rašeńnie. Ale jano nikčemnaje i niesapraŭdnaje, pakolki, zhodna sa statutam, praŭleńnie nie maje prava vyklučać siabraŭ partyi biez zaklučeńnia Kamisii pa etycy», — zajaviŭ V. Sinica ahienctvu ELTA u piatnicu.

Raniej Sinica skardziŭsia ŭ prakuraturu na Siarhieja Cichanoŭskaha, a taksama zaklikaŭ anulavać u Vilni akredytacyju Ofisa Śviatłany Cichanoŭskaj.

Taksama ŭ minułuju piatnicu jon arhanizavaŭ u Vilni akcyju suprać Ofisa Śviatłany Cichanoŭskaj.

Kamientary da artykuła