Pastaŭki nafty pa naftapravodzie «Družba» ŭ Jeŭropu znoŭ spynilisia
Unačy stała viadoma, što USU znoŭ atakavali stancyju pierapampoŭvańnia nafty ŭ Branskaj vobłaści.
Skryn videa ataki na stancyju «Unieča»
Pastaŭki nafty pa naftapravodu «Družba» znoŭ spynilisia, zajaviŭ ministr zamiežnych spraŭ Vienhryi Pieter Sijarta.
«Unačy my atrymali viestku, što znoŭ — užo treci raz za karotki čas — byŭ učynieny napad na naftapravod «Družba» na rasijska-biełaruskaj miažy. Pastaŭki nafty ŭ Vienhryju znoŭ spynilisia!» — napisaŭ jon.
Pavodle jaho słoŭ, heta jašče adna sproba ŭciahnuć Vienhryju ŭ vajnu.
«Nie atrymajecca! My i dalej budziem usimi siłami padtrymlivać namahańni dziela miru, a našy nacyjanalnyja intaresy abaronim!» — zapeŭniŭ jon.
Siońnia nočču stała viadoma pra pažar na stancyi pierapampoŭvańnia nafty va Uniečy Branskaj vobłaści, jakaja była atakavanaja dronami.
Videa nastupstvaŭ ataki na NPS Unieča apublikavaŭ kamandujučy Siłami bieśpiłotnych sistem Ukrainy.
Papiaredni raz jana hareła 12 žniŭnia, adnak prapampoŭvańnie nafty praź jaje praz paru dzion adnaviłasia.
Praz Unieču i naftapravod «Družba» atrymlivajuć naftu Vienhryja i Słavakija, a taksama Mazyrski naftapierapracoŭčy zavod i navapołacki «Naftan».