Urad ZŠA pačynaje tatalnuju pravierku ŭsich 55 miljonaŭ uładalnikaŭ amierykanskich viz

Meta pravierki — vyjavić lubyja parušeńni, jakija mohuć stać padstavaj dla anulavańnia vizy i nastupnaj departacyi. Hety krok zakranie navat tych, chto ciapier znachodzicca pa-za miežami krainy, ale maje amierykanskuju vizu.

Piačatka Dziaržaŭnaha departamienta. Fota: Alex Brandon / AP Photo

Jak paviedamlaje Associated Press, 21 žniŭnia Administracyja prezidenta ZŠA Donalda Trampa abviaściła pra pačatak maštabnaj pravierki bolš jak 55 miljonaŭ zamiežnych hramadzian, jakija majuć dziejučyja vizy ŭ ZŠA, na najaŭnaść lubych parušeńniaŭ, jakija mohuć pryvieści da departacyi.

U piśmovym adkazie na pytańnie ahienctva Dziaržaŭny departamient ZŠA adznačyŭ, što ciapier usie ŭładalniki viz, uklučajučy turystaŭ, studentaŭ i pracoŭnych mihrantaŭ padlahajuć tak zvanaj «pastajannaj praviercy» (continuous vetting). Heta aznačaje, što amierykanskija ŭłady buduć pastajanna manitoryć infarmacyju pra zamiežnikaŭ navat paśla vydačy vizy.

Kali ŭ pracesie pravierki budzie znojdziena lubaja infarmacyja, jakaja stavić pad sumnieŭ prava čałavieka na ŭjezd abo znachodžańnie ŭ ZŠA, jaho viza budzie nieadkładna anulavana. Kali ŭładalnik takoj vizy ŭ hety momant znachodzicca na terytoryi Złučanych Štataŭ, jaho čakaje pracedura departacyi.

Pavodle aficyjnych asob, pravierki buduć uklučać analiz akaŭntaŭ usich uładalnikaŭ viz u sacyjalnych sietkach, vyvučeńnie zapisaŭ pravaachoŭnych i mihracyjnych orhanaŭ u ich rodnych krainach, a taksama ŭličvać lubyja parušeńni zakanadaŭstva ZŠA, jakija ciahnuć za saboj pravavyja nastupstvy i byli ŭčynieny padčas znachodžańnia ŭ Złučanych Štatach.

Dla pravierak buduć vykarystoŭvacca novyja instrumienty zboru danych pra minułych, ciapierašnich i budučych zajaŭnikaŭ. Heta ŭklučaje poŭny i detalny ahlad sacyjalnych sietak, što stała mahčymym dziakujučy novym patrabavańniam, uviedzienym raniej u hetym hodzie. Zhodna ź imi, zajaŭniki abaviazany adklučać nałady pryvatnaści na mabilnych telefonach i inšych elektronnych pryładach abo ŭ prahramach, kali jany prychodziać na vizavaje sumoŭje.

Pieršy ŭdar: kiroŭcy-dalnabojščyki

Adnym ź pieršych kankretnych krokaŭ stała rašeńnie spynić vydaču pracoŭnych viz dla kiroŭcaŭ kamiercyjnych hruzavikoŭ. Dziaržsakratar Marka Rubia zajaviŭ, što heta robicca dla «abarony žyćciaŭ amierykancaŭ i pracoŭnych miescaŭ amierykanskich kiroŭcaŭ».

Aficyjnaj pryčynaj taksama nazyvajecca pavyšeńnie biaśpieki na darohach, bo ŭłady ŭzmacnili patrabavańni da vałodańnia anhlijskaj movaj siarod kiroŭcaŭ.

Adnak ekśpierty, takija jak Edvard Ołden z Savieta pa mižnarodnych adnosinach, bačać u hetym bolš hłybokuju tendencyju. Na jaho dumku, hety krok — častka skaardynavanaj kampanii, meta jakoj — adbić u amierykanskich kampanij, univiersitetaŭ i balnic žadańnie najmać zamiežnych śpiecyjalistaŭ.

«Meta tut nie ŭ kankretnych prafiesijach, a ŭ tym, kab dasłać sihnał pracadaŭcam: kali vy najmajecie zamiežnikaŭ, vy ryzykujecie», — ličyć Ołden.

Donald Tramp. Fota: Bill Pugliano / Getty Images

Ad studentaŭ da ŭsich astatnich

Pieršapačatkova ŭzmocnienyja pravierki byli skancentravany na studentach, asabliva tych, chto ŭdzielničaŭ u prapaleścinskich abo antyizrailskich akcyjach. Adnak ciapier hety praces raspaŭsiudziŭsia na absalutna ŭsich uładalnikaŭ viz.

Statystyka Dziarždepartamienta paćviardžaje surjoznaść namieraŭ: z momantu viartańnia Donalda Trampa ŭ Bieły dom było anulavana ŭdvaja bolš viz, čym za anałahičny pieryjad minułaha hoda.

Kolkaść anulavanych studenckich viz vyrasła ŭ čatyry razy. Tolki za apošni čas było adklikana bolš za 6000 studenckich viz za roznyja parušeńni — ad kiravańnia ŭ niećviarozym stanie da padtrymki teraryzmu.

Pad pahrozaj apynulisia hramadzianie bolšaści krain śvietu, uklučajučy takija hustanasielenyja, jak Kitaj, Indyja, Rasija, a taksama žychary bolšaści krain Afryki i Łacinskaj Amieryki, jakim dla pajezdki ŭ ZŠA nieabchodna atrymlivać vizu.

Vyklučeńnie składajuć hramadzianie 40 krain, jakija ŭvachodziać u Prahramu biaźvizavaha ŭjezdu (Visa Waiver Program). Heta pieravažna krainy Jeŭropy i niekatoryja azijackija dziaržavy. Ich hramadzianie mohuć naviedvać ZŠA z turystyčnymi abo dziełavymi metami na termin da 90 dzion bieź vizy.

Varta adznačyć, što ličba ŭ 55 miljonaŭ značna pieravyšaje kolkaść zamiežnikaŭ, jakija fizična znachodziacca ŭ ZŠA. Dla paraŭnańnia, pavodle danych Ministerstva ŭnutranaj biaśpieki, u minułym hodzie ŭ krainie było 12,8 miljona ŭładalnikaŭ hryn-kart i ŭsiaho 3,6 miljona čałaviek z časovymi vizami (pracoŭnymi, studenckimi i inšymi).

Jak patłumačyła vydańniu ekśpiert ź Instytuta mihracyjnaj palityki Julija Hiełat, ličba ŭ 55 miljonaŭ uklučaje ŭsich, chto maje amierykanskuju vizu, u tym liku miljony ludziej, jakija zaraz znachodziacca za miežami ZŠA i vałodajuć šmatrazovymi turystyčnymi vizami. Mnohija ź ich mohuć nikoli bolš nie skarystacca svajoj vizaj, što stavić pad sumnieŭ metazhodnaść raschodavańnia resursaŭ na ich tatalnuju pravierku.

Kamientary da artykuła