Karpušonak pra «charasmient» z boku Łatuški: U mianie niama takich vidavočnych dokazaŭ, jakich ad mianie ciapier usie patrabujuć

Byłaja supracoŭnica NAU i delehatka Kaardynacyjnaj rady Volha Karpušonak 30 žniŭnia abvinavaciła adnaho z samych viadomych lidaraŭ demsił Paŭła Łatušku ŭ seksualnych damahańniach i pahrozach. Paśla hetaha jana syšła ŭ cień: zredku źjaŭlałasia ŭ publičnaj infaprastory i ihnaravała ŭsie prośby pra kamientary. Praz paŭtara tydnia Volha vyrašyła pierapynić maŭčańnie i pahavaryła z «Lusterkam».

Volha Karpušonak, sakavik 2025 hoda. Fota: instagram.com/karpushonak26

«Ja ŭspryniała heta narmalna, bo ŭsio vyhladała jak znajomstva z supracoŭnikam»

— Davajcie pačniom z nadzionnaj situacyi. U vašaj zajavie ŭ prakuratury Ispanii i Polščy vy napisali, što pakinuli Jeŭrasajuz i znachodziciesia ŭ adnosna biaśpiečnym miescy. Ci možacie skazać, dzie mienavita?

— Nie, bo ja ŭsio jašče delehatka Kaardynacyjnaj rady, i ŭ dačynieńni da mianie ŭ Biełarusi raspačatyja čatyry kryminalnyja spravy. To-bok mnie treba ratavacca jašče i ad KDB. Ale adčuvaju siabie ŭ adnosnaj biaśpiecy. I heta nie Jeŭrasajuz.

— Vy doŭha nie vychodzili na suviaź z žurnalistami i kalehami. Što prymusiła vas pierapynić maŭčańnie mienavita ciapier?

— Ja razumieju, što mušu raskazać svaju historyju, svaju viersiju padziej. Čamu ja doŭha maŭčała? Skažu ščyra, pieršyja niekalki dzion naohuł nie adkazvała na paviedamleńni. Nie čytała heta ŭsio, było vielmi ciažka. Ja bačyła, što mnie prychodziać niejkija paviedamleńni vielmi niehatyŭnaha charaktaru, i niekalki dzion ich nie adkryvała. Potym pacichu pačała ŭžo napaŭniać siabie hetaj infarmacyjaj. Pajšli niejkija novyja fakty, novyja zajavy z boku Pał Pałyča [Łatuški]. Ja vyrašyła, što ludzi nie razumiejuć, što adbyłosia, i treba heta rastłumačyć. Ciapier ja da hetaha maralna hatovaja.

— Jak vy aceńvajecie svoj fizičny i psichałahičny stan paśla ŭsiaho taho, što adbyłosia?

— Ciažka, viadoma. Było vielmi składana pieršyja niekalki dzion. Ciapier ja ŭžo starajusia brać siabie ŭ ruki. Bolš za ŭsio chvalujusia za svaich rodnych. Ja atrymlivaju pahrozy, ale za siabie nie bajusia. Ja bajusia za blizkich, bo im taksama pahražajuć.

Skrynšoty paviedamleńniaŭ z pahrozami, jakija atrymała Volha Karpušonak i jaje baćki. Vyjavy ad surazmoŭcy, kałaž «Lusterka»

— Vierniemsia da zajavy ŭ prakuraturu. U joj vy adznačyli, što pieraśled z boku Łatuški doŭžyŭsia z 7 śniežnia 2024 hoda da pačatku studzienia 2025-ha. Možacie rastłumačyć, što vy ŭkładajecie ŭ paniaćci «dziejańni seksualnaha charaktaru», «niepažadanyja dotyki» i «prapanovy seksualnaha charaktaru»?

— Zaraz ja raskažu ŭsiu historyju, kab vy zmahli zadavać udakładnialnyja pytańni.

U 2024 hodzie ja žyła va Ukrainie. U mianie byli peŭnyja prablemy z ukrainskimi śpiecsłužbami, i ja pryniała rašeńnie pierajazdžać u Polšču. Sa mnoj źviazaŭsia Arciom Praskałovič (były supracoŭnik administracyi Łukašenki, juryst NAU. — Zaŭv. «Lusterka») i na daručeńnie Łatuški prapanavaŭ dałučycca da ich kamandy. Ja pahadziłasia. U listapadzie ja pierajechała. Jany niekalki dzion pa svaich pratakołach biaśpieki mianie praviarali, i potym ja pačała pracavać. Heta byŭ kaniec taho miesiaca.

Datu 7 śniežnia ja dakładna pamiataju, bo napiaredadni ŭ nas była sustreča ŭ Ministerstvie ŭnutranych spraŭ Polščy, paśla jakoj Pał Pałyč zaprasiŭ mianie ŭ restaran. Ja ŭspryniała heta narmalna, bo ŭsio vyhladała jak znajomstva z supracoŭnikam. Ale ŭžo padčas sustrečy zrazumieła, što jon namiakaje na bolš asabistyja znosiny.

Ja viedała, što Łatuška nie žanaty. Na toj momant ja ničoha nie viedała pra najaŭnaść u jaho niejkich adnosin, tamu, u pryncypie, nie bačyła ŭ hetym ničoha strašnaha. Ale potym na pracy ja daviedałasia, što, akazvajecca, jon žyvie ź dziaŭčynaj z NAU. Ja vielmi ździviłasia.

Kali Łatuška zaprasiŭ mianie jašče raz, ja skazała, što dla mianie heta ŭsio nieprymalna, i prapanavała kamunikavać tolki ŭ pracoŭnym paradku. Jon pačaŭ pierakonvać, što ŭ jaho z hetaj dziaŭčynaj ničoha surjoznaha, što ja jamu vielmi padabajusia jak žančyna i hetak dalej. Ale ja kankretna dała zrazumieć, što pamiž nami ničoha nie budzie. U pryncypie, ja za svajo žyćcio nie raz sutykałasia z takimi situacyjami, ale paśla vidavočnaj admovy z majho boku mužčyny bolš nie rabili nijakich dziejańniaŭ, i my praciahvali pracavać.

Hetym razam usio było nie tak. Łatuška niejki čas jašče pisaŭ mnie asabistyja paviedamleńni, moh na pracy niejak pažartavać, kali my byli sam-nasam. Adnojčy byŭ vypadak, kali my jechali ŭ lifcie razam z kalehami paśla niejkaj sustrečy, i Łatuška nieprykmietna pamacaŭ mianie za azadak. Mianie heta vielmi źbiantežyła, ja razhubiłasia i nie viedała, jak siabie pavodzić.

Ja vykazała jamu ŭsio asabista ŭ kabiniecie, paprasiła bolš tak nie rabić, inakš raskažu ŭsio jaho dziaŭčynie. Na što Łatuška adkazaŭ, što heta hłupstva i što ja mahu pra heta paškadavać. Paźniej jon niekalki razoŭ pytaŭ, ci zrabiła ja ŭžo DNŽ — ja tady była ŭ pracesie afarmleńnia. I namiaknuŭ, što jamu budzie dastatkova skazać niekalki słoŭ, kab mianie pryznali pahrozaj nacbiaśpiecy i departavali z Polščy.

Časta kažuć, što heta hučyć jak tryźnieńnie: maŭlaŭ, Pał Pałyč nie maje takoha ŭpłyvu na śpiecsłužby. Mnie taki pohlad padajecca zanadta naiŭnym. Ja nie śćviardžaju, što polskija słužby niejak karumpavanyja i dziela Łatuški pojduć na niezakonnyja dziejańni. Ale ja razumieju, što lubaja śpiecsłužba pierastrachujecca, kali padazreńni buduć pachodzić ad takoha aŭtarytetnaha čałavieka.

Čamu ja ličyła hetyja pahrozy realnymi? Paśla majoj admovy, prykładna sa studzienia, ja pačała čuć ad roznych supracoŭnikaŭ NAU na svoj adras źjedlivyja žarty, što nibyta ja ŭkarenienaja ŭ arhanizacyju na zadańnie śpiecsłužbaŭ. Pryčym viersii byli i pra SBU, i pra KDB. Usio heta havaryłasia nibyta žartam, ale davoli časta. Mianie heta kranała. Atmaśfiera ŭ cełym była vielmi taksičnaja.

Pracavać było vielmi ciažka, ale ja ličyła svaje zadačy važnymi — ja zajmałasia prablemami biełarusaŭ. Raźličvała, što situacyja niejak naładzicca, tamu praciahvała pracavać.

Łatuška nie moh mianie zvolnić adkryta, bo dla hetaha nie było padstaŭ. Jon pajšoŭ takim šlacham, kab ja pajšła sama. Asabliva situacyja abvastryłasia paśla źniknieńnia Anžaliki Mielnikavaj. U nas adbyłasia razmova z Arciomam Bruchanom (supracoŭnik NAU, dziejny śpikier KR. — Zaŭv. «Lusterka») i Arciomam Praskałovičam u siaredzinie krasavika, padčas jakoha ja adkazała na ŭsie ich pytańni. Jany prapanavali prajści palihraf. Ja pahadziłasia. Bolš za toje, u Kaardynacyjnaj radzie ja zaŭsiody padtrymlivała inicyjatyvu nakont pravierki na palihrafie ŭsich delehataŭ.

Padčas strymu 30 žniŭnia Pavieł Łatuška zajaviŭ, što Volzie Karpušonak prapanoŭvali prajści palihraf 15 krasavika 2025 hoda na sustrečy z udziełam śpikiera KR Arcioma Bruchana i namieśnika palityka Arcioma Praskałoviča. «Praz tydzień jana pakinuła našuju kamandu. Jana prosta syšła. Takim čynam prademanstravaŭšy, što jana nie hatovaja prajści palihraf», — śćviardžaŭ Łatuška.

Paśla hetaha ja pracavała jašče try tydni. Bolš da pytańnia pra palihraf nichto nie viartaŭsia. Situacyja ŭ ofisie nie mianiałasia. Ja razumieła, što mnie treba paŭnavartasna zajmacca svajoj apłačvanaj pracaj (u NAU, sa słovaŭ Volhi, jana pracavała na vałanciorskich pačatkach. — Zaŭv. «Lusterka»), i ja pastupova pieraklučyłasia na supracoŭnictva anłajn. Vykonvała niejkija epizadyčnyja zadačy i až da publikacyi svajho pasta ŭ ofisie NAU bolš nie pakazvałasia.

Potym ja pajšła. Viedaju, što z boku Łatuški raspaŭsiudžvalisia čutki pra majo supracoŭnictva sa śpiecsłužbami nie tolki ŭ NAU, ale i siarod delehataŭ KR. Kali abirałasia ŭ Parłamienckuju asambleju Rady Jeŭropy, ad niekatorych delehataŭ ź inšych frakcyj čuła, što frakcyja Łatuški ličyć mianie supracoŭnicaj śpiecsłužbaŭ. Choć publična jany pra heta nikoli nie zajaŭlali, usio adbyvałasia kułuarna i pastajanna.

«Ad mianie patrabavali špijonić za inšymi ŭdzielnikami demruchu»

— Vy zhadvali prablemy sa Słužbaj biaśpieki Ukrainy. Raskažycie padrabiaźniej.

— Varta viarnucca da ŭkrainskaj historyi, bo heta ŭsio źviazana. U 2022 hodzie, kali ja padavałasia na ŭkrainski VNŽ, była standartnaja pravierka SBU. Jany daviedalisia, što ja raniej była advakatkaj, i, naturalna, u mianie byli kantakty ŭ biełaruskich pravaachoŭnych orhanach. Tamu mianie adpravili na palihraf. Ja jaho prajšła paśpiachova. Heta paćviardžajecca tym, što ja atrymała svoj dazvoł na žycharstva, jaki, darečy, dziejničaje dahetul i nie anulavany (dazvoły na žycharstva va Ukrainie, terminy dziejańnia jakich zakančvajucca paśla 22 lutaha 2022 hoda, ličacca sapraŭdnymi da zakančeńnia vajennaha stanovišča. — Zaŭv. «Lusterka»).

Dazvoł na žycharstva va Ukrainie, vydadzieny Volzie Karpušonak. Fota: facebook.com/olga30032018

Z 2022-ha da 2024-ha ja pieryjadyčna mieła znosiny z SBU, jany prasili ŭ mianie niejkuju infarmacyju pra biełaruski bok. Ja ličyła heta absalutna narmalnym, bo ŭ toj momant ščyra vieryła, što takim čynam dapamahaju Ukrainie i što heta karysna dla ich pieramohi.

Ale ŭ 2024 hodzie ŭ ich pamianiaŭsia načalnik adździeła, jaki zajmajecca biełarusami, i sa mnoj pačali pracavać našmat ščylniej. Stali patrabavać špijonić za inšymi ŭdzielnikami biełaruskaha demakratyčnaha ruchu. Hetaha ja rabić nie chacieła. Na mianie ŭvieś čas cisnuli, kazali, što mienavita ad ich zaležyć, zastanusia ja va Ukrainie ci nie, ci padoŭžać moj dazvoł na žycharstva i hetak dalej.

Volha Karpušonak u Adesie, krasavik 2022 hoda. Fota: instagram.com/karpushonak26

Kali mnie kažuć, što SBU tak nie pracuje, što heta nie KDB, dla mianie heta vyhladaje vielmi naiŭna. Ja sama jurystka, pracavała ŭ jurydyčnaj firmie i bačyła, jakija rašeńni prymajucca ŭ dačynieńni da biełarusaŭ i rasijan. Tamu ŭ mianie nijakich iluzij nie było. I pakolki cisk byŭ dastatkova mocnym i nastojlivym, ja zrazumieła, što nie zmahu narmalna žyć va Ukrainie, i treba pierajazdžać, kali chaču niejkich pierśpiektyŭ dla svajoj budučyni.

Kali jany pačali na mianie cisnuć, ja stała zapisvać našy razmovy. Śviadoma ich nie publikuju, bo ŭ hetych razmovach zhadvajucca i inšyja biełarusy, a ŭ mianie niama mety ich dyskredytavać, jak i ŭkrainskija śpiecsłužby ŭ cełym.

Kali ja źjechała ŭ Polšču, sa mnoj jašče niekalki razoŭ źviazvalisia, cikavilisia pracaj u NAU, na što ja adkazała dosyć hruba. U mianie jość skrynšot takoj pierapiski.

Skrynšoty pierapiski Volhi Karpušonak z, jak miarkujecca, supracoŭnikam SBU. Fota: asabisty archiŭ. Kałaž «Lusterka»

Paśla taho jak ja apublikavała svoj post, Aleh Kuleša (eks-palitviazień, delehat KR. — Zaŭv. «Lusterka») publična zajaviŭ, što ŭ jaho jość infarmacyja ź niejkaj vartaj davieru krynicy z Ukrainy, što ja prajšła palihraf ź niespryjalnym vynikam i aficyjna padazrajusia ŭ supracoŭnictvie z KDB. Pavieł Paŭłavič u svaim strymie zajaviŭ, što ŭ jaho jość paviedamleńni ad niejkich ananimnych dobraachvotnikaŭ, jakija zajavili, što ja źbirała infarmacyju pra ich, i mianie treba zatrymać u Polščy.

Pra heta napisali ŚMI, i ludzi ciapier abmiarkoŭvajuć, što ja ahient režymu, što mianie vyhnali z Ukrainy, što ja nie prajšła palihraf i hetak dalej. Darečy, dzie ciapier hetyja ananimnyja dobraachvotniki — niezrazumieła.

«Dziejańni, pra jakija ja kažu — adny z tych, dakazać jakija najbolš składana»

— Vierniemsia da abvinavačańniaŭ u adras Paŭła Łatuški. Vy zhadali incydent u lifcie. Ci byli jašče padobnyja dziejańni?

— Davajcie źvierniemsia da značeńnia termina «charasmient». Heta nie tolki seksualnyja damahańni, ale i lubyja dziejańni, u tym liku pahrozy, jakija stvarajuć vakoł čałavieka niespryjalnuju abstanoŭku, vyklikajuć pačućcio strachu.

Ź jaho boku heta vyjaviłasia ŭ tym, što spačatku jon namiakaŭ i prapanoŭvaŭ mnie ŭstupić ź im u asabistyja adnosiny, sprabavaŭ mianie pamacać padčas sustrečy ŭ restaranie, a taksama pieryjadyčna, kali my zastavalisia sam-nasam na pracy, u jaho kabiniecie. I voś hety vypadak u lifcie.

Ale asnoŭnaje nie heta. Vy ž razumiejecie, što takoje ŭ maim žyćci zdarałasia nieadnarazova, jak i ŭ luboj žančyny. Asnoŭnaje — toje, što paśla majoj vidavočnaj admovy jon pačaŭ na mianie cisnuć, pahražać, vykarystoŭvajučy svajo słužbovaje stanovišča i svaju ŭpłyvovaść.

— Pahrozy byli tolki vusnymi ci ŭ pierapiscy taksama?

— My ź im razmaŭlali ŭ sakretnym čacie z funkcyjaj aŭtamatyčnaha vydaleńnia. Naturalna, u toj momant, kali ŭsio tolki pačynałasia, ja ničoha nie fiksavała: nie zapisvała razmoŭ, nie rabiła skrynšotaŭ. Tamu ŭ mianie niama takich vidavočnych dokazaŭ, jakich ad mianie ciapier usie patrabujuć.

I ŭ cełym jak advakat mahu skazać, što tyja dziejańni, pra jakija ja kažu — adny z tych, dakazać jakija najbolš składana. Ale ŭ mianie jość častka pierapiski i maleńki aŭdyjozapis. Ja nie chaču ich pakazvać ciapier, kab nie davać Łatušku mahčymaści padrychtavacca, sfalsifikavać abviaržeńni. Jak advakatka pa kryminalnych spravach ja viedaju, što časam dokazy nie varta vykładvać publična zahadzia.

— Vašyja kalehi zhadvali, što raniej vy pazityŭna adklikalisia pra Łatušku. Čamu vy vyrašyli apublikavać abvinavačańni mienavita ŭ žniŭni?

— Ja zaŭsiody imknułasia da abjektyŭnaści. Pry ŭsim tym, što ja ciapier kažu pra Pał Pałyča, heta nie admianiaje taho, što jon robić šmat karysnaha. Akramia taho, ja nie chacieła raniej pra heta zajaŭlać, bo vydatna razumieła, z čym sutyknusia, z ulikam jaho reputacyi, i što heta naškodzić demsiłam u cełym. Tamu ja maksimalna adciahvała hety momant. Ja spadziavałasia, što pajdu z NAU, i pra mianie zabuduć, adčepiacca. Ale hetaha nie adbyłosia. U žniŭni ja razmaŭlała z našymi ahulnymi kalehami i taksama čuła, što ja ahient režymu. Tamu prosta pajšła na apiaredžańnie. Kali b Łatuška realizavaŭ svaje pahrozy, mianie b prosta departavali i ŭsio. A ciapier chacia b u polskich pravaachoŭnych orhanaŭ jość dźvie pazicyi, i jany abaviazanyja ź imi raźbiracca. Publičnymi vykazvańniami ja siabie abaraniaju.

Heta taksama moj abaviazak. My nie dla taho pajechali ź Biełarusi, kab budavać novuju dyktaturu, kali ludzi bajacca havaryć. A ciapier realna bajacca, mnie ŭ pryvat mnohija napisali słovy padtrymki, ale hetyja ludzi nie vystupili publična. Ja nabrałasia śmiełaści vystupić. Tak, heta budzie ciažki praces i dla nas, i dla demsiłaŭ, ale ŭ vyniku my staniem lepšymi.

— Polskaja prakuratura paćvierdziła nam atrymańnie vašaj zajavy, ale jana jašče nie była zarehistravanaja. Ci jość u vas niejkaja infarmacyja ad uładaŭ z hetaj nahody?

— Nie bolš, čym u vas. Ad Ispanii ŭ mianie taksama jość paviedamleńnie, što moj zvarot atrymany, ale pakul nijakich dalejšych ruchaŭ niama. Ci buduć pa im prymacca pracesualnyja rašeńni, ja pakul nie viedaju.

«Mnie dasłali maju fatahrafiju, zroblenuju kimści ŭ tym horadzie, dzie ja zapisvała videa»

— Vy skazali, što pakul nie chočacie publikavać dokazy, jakija prykłali da zajavy. Ale, mahčyma, vy možacie raskazać pra źmiest hetych paviedamleńniaŭ?

— Hetyja paviedamleńni ŭ Telegram paćviardžajuć maju historyju pra toje, što Łatuška prapanuje mnie pierajści na bolš asabistyja adnosiny, i jość peŭnyja namioki, u pryvatnaści, na stvareńnie mnie prablem.

— U adnym z pastoŭ u Facebook vy zhadali, što atrymali pahrozu, u jakoj było paznačanaje vašaje dakładnaje miescaznachodžańnie i tajemna zroblenaje fota. Jak dumajecie, ad kaho jana moža iści?

— Mnie naohuł vielmi šmat prychodzić ciapier pahroz, ja dasłała vam skrynšoty. Ja nie viedaju, ad kaho jany iduć, paniaćcia nie maju. Moža, ad ukraincaŭ, moža, ad Łatuški, moža, prosta ad niejkich «dobrazyčliŭcaŭ». Mnie dasłali maju fatahrafiju, zroblenuju kimści ŭ tym horadzie, dzie ja zapisvała videa. Chto hetyja ludzi, ja nie viedaju.

Fotazdymak Volhi Karpušonak, tajemna zrobleny nieviadomym i dasłany joj u supravadžeńni pahroz. Vyjavy ad surazmoŭnicy, kałaž «Lusterka»

— Vy zhadvali, što byli ŭ NAU vałanciorkaj, a nie štatnaj supracoŭnicaj, i zarobku nie atrymlivali. Ale ŭ vašaj zajavie ŭ prakuraturu havorka išła pra mahčymaść pavyšeńnia zarobku. Jak heta suadnosicca?

— Ja afarmlała dakumienty, u mianie nie było dazvołu na žycharstva, ja jaho atrymała ŭžo bližej da leta, tamu mianie nie mahli ŭładkavać na pracu aficyjna. Ale Łatuška paru razoŭ pieradavaŭ mnie hrošy asabista ad siabie. Ja jamu na hetyja sumy pisała raśpiski. Heta było ŭ śniežni-studzieni. Nievialikija sumy: 100 jeŭra, 400 złotych. Ale, naturalna, havorka išła pra toje, što ja budu atrymlivać zarobak u NAU. Adnak da momantu zvalnieńnia ja jaho tak i nie atrymała.

— Pavieł Łatuška admaŭlaje sustreču ŭ restaranie i kaža, što jaho miescaznachodžańnie kruhłasutačna adsočvajuć polskija słužby. Vy jašče nastojvajecie, što hetaja sustreča była?

— Tak, hetaja sustreča była. Na toj momant, naturalna, u mianie nie było pryčyn fiksavać daty ci miescy, tamu dakładna dzień ja vam nie nazavu. Heta byŭ pačatak śniežnia. Restaran znachodziŭsia ŭ rajonie płoščy Kanstytucyi (Plac Konstytucji ŭ Varšavie. — Zaŭv. «Lusterka»), ale dakładnaj jaho nazvy ja nie pamiataju.

— U svaim pieršym paście vy napisali, što ŭ restaranie padčas supolnaj viačery z Łatuškam aficyjanty viedali, jakoje vino jon lubić. U adkaz na heta sam palityk zajaviŭ, što ŭžo doŭhi čas nie pje ałkaholu.

— Vidać było, što Łatuška raźbirajecca ŭ dobrych vinach, i aficyjanty viedali pra jaho husty. Ale jon tolki pryhubiŭ, naohuł jon nikoli pry mnie ci kamandzie asabliva nie piŭ ałkaholu. U NAU kazali, jon moža vypić tolki doma. Nie viedaju, z čym heta źviazana.

— Vašaja kaleha pa frakcyi «Chopić bajacca» Taćciana Martynava vykazvała aściarohu, što vami mohuć manipulavać. Vy ź joj razmaŭlali paśla hetaha?

— My niekalki razoŭ razmaŭlali, ja joj dasyłała videa-kružočki. Tak, jana ličyć, što mnoj manipulujuć. Ja joj skazała, što heta nie tak, ale zrazumieła, što jana budzie prytrymlivacca svajoj pazicyi. Adnosiny narmalnyja. Ja nie chaču jaje ŭ heta ŭciahvać, tamu nikoli joj pra heta nie raskazvała.

— Sakrataryjat Kaardynacyjnaj rady zajaviŭ, što vy ŭ pieryjad z sakavika da žniŭnia 2025 hoda spampavali bolš za 70 rabočych dakumientaŭ, i nazvaŭ vašuju aktyŭnaść nietypovaj. Navošta vam spatrebilisia hetyja fajły?

— Na sazvonie Rady frakcyj KR ja padała skarhu na dziejańni Sakrataryjata z prośbaj abvierhnuć hetuju infarmacyju, bo ja nikoli nie spampoŭvała nijakich fajłaŭ z ahulnaha dyska KR. Ja mahła ich adkryvać i redahavać, ale nikoli nie zapampoŭvała ŭ režymie «zahruzić na svaju pryładu» abo «zachavać na svoj dysk». I ja paprasiła dać mnie dokazy-skrynšoty, dzie budzie vyrazna vidać, što i kali ja zapampoŭvała.

Što da źmianieńnia majoj aktyŭnaści, to jana nie źmianiałasia. Ja jak da sakavika pracavała z dakumientami Kaardynacyjnaj rady, tak i pracavała paśla. Mianie vielmi ździviła takaja publikacyja. Ja zaŭsiody ličyła, što Sakrataryjat publikuje bolš-mienš abjektyŭnyja i dakładnyja źviestki.

Kali Sakrataryjat maje na ŭvazie, što ja adkryvała 70 dakumientaŭ, vykarystoŭvajučy słova «spampavać», heta śviedčyć pra toje, što ŭ Kaardynacyjnaj radzie ja sapraŭdy pracavała, a nie prosta prysutničała i hałasavała pa ŭkazcy lidaraŭ frakcyj. Atrymlivajecca, luby delehat, jaki biare aktyŭny ŭdzieł u dziejnaści KR, aŭtamatyčna padazrajecca ŭ supracoŭnictvie z režymam.

Volha Karpušonak u Adesie, travień 2022 hoda. Fota: instagram.com/karpushonak26

— Usio, što adbyvajecca, Pavieł Łatuška i NAU nazvali apieracyjaj KDB pa dyskredytacyi. Što vy adkažacie na pramoje abvinavačańnie ŭ pracy na śpiecsłužby?

— U nas lubaja krytyka na adras demsił, a asabliva takaja, jak maja, usprymajecca jak praca na režym. Bo, viadoma, u niejkaj stupieni heta režymu vyhadna. Ale heta nie značyć, što my ŭsie pavinnyja maŭčać.

Kali b u jaho (Łatuški. — Zaŭv. «Lusterka») byli realnyja, abhruntavanyja padazreńni, jon by nie dapuściŭ mianie da pracy z dalikatnaj infarmacyjaj u NAU i ŭ delehacyi ŭ PARIE. Tamu ja liču, što ŭsie hetyja pretenzii ź jaho boku absalutna nieabhruntavanyja.

I jašče: kali b za mnoj stajali śpiecsłužby, to, mabyć, usia hetaja historyja była b padrychtavanaja našmat lepš. A ja, kali vy zaŭvažyli, navat nie zmahła zapisać videa tak, kab nielha było identyfikavać majo miescaznachodžańnie.

— Pavieł Łatuška padaŭ suprać vas pazoŭ pra abaronu honaru i hodnaści. Budziecie ŭdzielničać u pracesie?

— Tak, ja bačyła hety pazoŭ. Viadoma, ja budu ŭdzielničać, budu abaraniacca, pracavać z advakatam. Na hety momant ja ŭ jaho pošuku. A jak ja budu davać tłumačeńni sudu — tut dva varyjanty: albo heta robić advakat na majo daručeńnie, albo ja sama pryjedu ŭ ES. My budziem jašče ź im raicca.

— A što musić adbycca, kab vy pryjechali ŭ ES?

— Ja mušu pierakanacca, što dla mianie heta biaśpiečna.

— Jakim čynam? Heta musiać być zapeŭnivańni polskich uładaŭ ci niešta inšaje?

— Ja budu abmiarkoŭvać heta z advakatam.

— Jakoj kančatkovaj mety vy dabivajeciesia? Adstaŭki Łatuški?

— Maja hałoŭnaja matyvacyja — abaranić siabie. Druhoje — ja chaču, kab ludzi viedali praŭdu, kab takija historyi nie dapuskalisia. Bo ja viedaju, što akramia toj žančyny, ź jakoj jon sustrakajecca ciapier, u jaho byli adnosiny jak minimum jašče ź dźviuma dziaŭčatami z NAU. Niezrazumieła, chto jašče trapić u takuju situacyju. A adstaŭka, adchileńnie — heta nie mnie vyrašać.

— Niekatoryja kamientatary ŭ demsiłach aścierahajucca, što hety skandał pryniasie škodu ŭsiamu ruchu. Što vy možacie na heta adkazać?

— Heta pytańnie z razradu «ci nie pracuju ja na režym». Zrazumieła, što ŭsie skandały ŭ niejkaj stupieni padryvajuć davier, ale tady ŭ nas zastajecca varyjant prosta siadzieć i maŭčać i z usim zhadžacca. I tady my pabudujem novuju dyktaturu.

Druhi momant: ja ž nie staviła pad sumnieŭ usie struktury ŭ cełym. Tak, ja vykazała niedavier Abjadnanamu pierachodnamu kabinietu, heta praŭda. Jany vystupili z zajavaj, jakaja mianie vielmi ździviła: zajavili pra svoj biezumoŭny davier Łatušku, nie dačakaŭšysia praviadzieńnia rasśledavańnia, prosta aŭtamatyčna zaniali jaho bok. Liču, što takoje niedapuščalna.

— Z Ofisa Śviatłany Cichanoŭskaj z vami vychodzili na kantakt?

— Nie.

— Jakija vašyja dalejšyja palityčnyja płany? Źbirajeciesia praciahvać dziejnaść?

— Ja pakul nie viedaju navat taho, u jakoj krainie mahu žyć. Usie pracesy na paŭzie. Ja nie vychodziła z Kaardynacyjnaj rady, ja ŭsio jašče delehatka i tam, i ŭ PARIE. Płanuju praciahvać svaju dziejnaść, ale vy ž razumiejecie, što da mianie jość vielizarny niedavier z boku biełarusaŭ — mianie ličać ahientam režymu. I ŭsio heta dziakujučy zajavam Łatuški i tamu, jak heta padajecca ŭ ŚMI. Ale budziem z hetym pracavać.

— U kancy vieraśnia — pačatku kastryčnika ŭ Strasburhu budzie siesija PARIE. Budziecie ŭdzielničać?

— Nie, bo ja nie ŭ ES.

— Mahčyma, jość jašče niešta, pra što ja nie spytaŭ, ale vy chacieli b vykazacca?

— Chaču źviarnuć uvahu na svoj tekst, raźmieščany na staroncy Minskaj haradskoj kalehii advakataŭ u 2021 hodzie. Za dzień da pasiedžańnia kvalifikacyjnaj kamisii ŭ Miniuście, jakaja pazbaŭlała advakataŭ licenzii, mnie prapanavali apublikavać artykuł, jaki moh by mnie dapamahčy.

Ja doŭha dumała. U toj dzień ja naviedvała ŭ SIZA dvuch svaich padabaronnych, palitviaźniaŭ, i papiaredziła ich, što, chutčej za ŭsio, zaŭtra mianie pazbaviać licenzii. Raskazała pra zroblenuju mnie prapanovu. Na što mnie adkazali: «Viadoma, rabi ŭsio što zaŭhodna, kab zachavać mahčymaść pracavać, bo ty nam patrebnaja». U toj momant u mianie było bolš za dziesiać klijentaŭ, jakija siadzieli ŭ SIZA, asnoŭnaja častka — palityčnyja. I ja zrazumieła, što pavinnaja zachavać svajo prava im dapamahać. Ja apublikavała hety artykuł. Jon, pa sutnaści, źmiaščaje vytrymki z praviłaŭ prafiesijnaj etyki advakata pra toje, što nieabchodna kłapacicca ŭ pieršuju čarhu pra intaresy klijenta, a nie pra ŭłasnuju papularnaść.

Dla ŭsich ludziej, jakija znachodzilisia tady ŭ Biełarusi, zrazumieła, što ja pajšła na heta dziela licenzii. A ciapier mianie hetym paprakajuć. Nichto nie asudžaje ludziej, jakija, naprykład, pišuć zajavy na pamiłavańnie ci pryznajuć vinu. Ja zrabiła toje samaje, kab zachavać licenziju. Voś i ŭsio.

Kamientary da artykuła