Palitviazień raskazaŭ, što ciapier ź Fiadutam i Parotnikavym u kałonii
Były palitviazień Viačasłaŭ Łazaraŭ raskazaŭ «Našaj Nivie» pra stan Alaksandra Fiaduty i Andreja Parotnikava, jakija znachodziacca za kratami ŭ 15‑j kałonii.
Alaksandr Fiaduta i Andrej Parotnikaŭ. Fota: spring96.org
Palitołahi Alaksandr Fiaduta i Andrej Parotnikaŭ adbyvajuć termin u mahiloŭskaj PK-15, dzie jašče niekalki dzion tamu znachodziŭsia viciebski žurnalist Viačasłaŭ Łazaraŭ. Viačasłaŭ akazaŭsia adnym z palitviaźniaŭ, jakija byli vyzvalenyja i hvałtoŭna vyviezienyja ŭ Litvu 11 vieraśnia.
Fiadutu zatrymali ŭ krasaviku 2021‑ha i asudzili na 10 hadoŭ źniavoleńnia pa abvinavačvańni ŭ zmovie z metaj dziaržpieravarotu. Parotnikaŭ, akramia anałahičnaha abvinavačvańnia, byŭ asudžany jašče pa čatyroch artykułach, u tym liku pa abvinavačvańni ŭ zdradzie dziaržavie. Prysud — tyja ž 10 hadoŭ.
Apielacyju Parotnikava razhledzieli ŭ sakaviku 2025-ha, to-bok mužčyna znachodzicca ŭ kałonii ŭsiaho niekalki miesiacaŭ. Łazaraŭ kaža, što Parotnikaŭ pavodzić siabie ŭ kałoni aściarožna i nie parušaje tamtejšyja praviły. I tym nie mienš, jon užo apynuŭsia pad presinham:
«Idzie cisk, i ja tak razumieju, što heta navat nie z boku administracyi kałonii, a [jość zahad] niedzie źvierchu. Spačatku jaho pieršy raz pasadzili ŭ ŠIZA, a potym, praź nievialički pramiežak času, znoŭ pa niejkaj nadumanaj nahodzie pasadzili ŭ ŠIZA na 15 sutak. I litaralna pierad vyzvaleńniem my daviedalisia, što jamu dali jašče dva miesiacy PKT».
Što datyčyć Alaksandra Fiaduty, jon, jak kaža Łazaraŭ, trymajecca dobra, chacia i maje prablemy z sercam:
«Pierasoŭvajecca z kijkom, jamu pastajanna dapamahaje niechta z chłopcaŭ. Žartuje, trymajecca badziora i jašče padtrymlivaje chłopcaŭ.
Kali byli pamiłavańni, jon źviartaŭsia da ŭsich — maŭlaŭ, nie turbujciesia, pišycie [prašeńni] na pamiłavańnie, hałoŭnaje vyjści na volu, a ŭ mianie takoj mahčymaści prosta niama».
Kali źjavilisia zajavy Trampa pra vyzvaleńnie biełaruskich palitviaźniaŭ, źjaviŭsia šans, što mohuć vyzvalić i Fiadutu, ličyć Viačasłaŭ:
«Kali ź im hutaryli apošni raz, jon z sumam kazaŭ — pieražyvaje, što nie zastaniecca ŭ Biełarusi, i budzie nie pry spravach niedzie za miažoj. Pieražyvaje za svaich blizkich. Bačna, što ŭ vačach ciaplicca nadzieja, bo ŭžo kolki hadoŭ jon siadzić.
Heta honar Biełarusi, čałaviek, ź jakim cikava pahutaryć».
Čytajcie taksama:
Mikoła Dziadok: Niehvałtoŭny supraciŭ nie pracuje, kali taki teror, jak u łukašenkaŭskaj Biełarusi
«Takoje ŭražańnie, što Viktara Babaryku taksama rychtujuć da vyzvaleńnia»
Vacłaŭ Areška całkam aślep. «Samaje strašnaje — unačy navobmacak chadzić u tualet»