«Usio — chłuśnia i manipulacyi». Śpiecyjalisty rezka adkazali na isteryju vakoł rekanstrukcyi Čyrvonaha kaścioła

Niadaŭna źjaviłasia navina, što vakoł Čyrvonaha kaścioła nibyta ŭzvodziacca ścieny, jakija zakryjuć vid na pomnik, i płanujuć pastavić aharodžu z kavanymi elemientami, jakich «nikoli nie było». Adnak śpiecyjalisty ŭ halinie achovy spadčyny padkreślivajuć: u hetych zajavach niama ni słova praŭdy.

Čyrvony kaścioł rychtujecca da pačatku rekanstrukcyi. Fota: virtualbrest.ru

Telehram-kanał «Spadčyna», jaki śpiecyjalizujecca na achovie i restaŭracyi historyka-kulturnaj spadčyny, pa punktach razabraŭ hetyja zajavy z kaścielnych kołaŭ.

U publikacyi, jakaja źjaviłasia na partale katolik.life, śćviardžałasia, što vakoł kaścioła ŭzvodzicca šeraja ściana, jakaja častkova zakryje vid na chram, a taksama ŭźviaduć vakoł chrama aharodžu, jakaja byccam by isnavała tolki «ŭ samym pačatku» bolš za sto hadoŭ tamu, i zrobiać heta z «adnaŭleńniem kavanych elemientaŭ», jakich, pavodle publikacyi, nikoli nie było.

Šeraja ściana, jakaja ŭzvodzicca ŭzdoŭž prajezda pamiž kaściołam i Domam urada. Fota: katolik.life

Kavanyja aharodžy, demantavanyja ŭ čas rekanstrukcyi kaścioła. Z tekstu artykuła moža skłaścisia ŭražańnie, što heta taja samaja aharodža, jakoj abniasuć kaścioł u vyniku. Fota: katolik.life

Aŭtary telehram-kanała «Spadčyna» pišuć, što apublikavanyja fotazdymki nijak nie paćviardžajuć hetuju infarmacyju. Jany miarkujuć, što muravanaja ściana, jakaja ciapier uzvodzicca z boku Doma ŭrada, moža być časovaj supraćpažarnaj ścianoj.

Takaja ž supraćpažarnaja ściana ŭžo ŭzvodziłasia na terytoryi kaścioła ŭ čas pieršaj čarhi rekanstrukcyi ŭ 2018 hodzie, bo budaŭničy haradok raźmiaščaŭsia zanadta blizka da samoj budoŭli.

Kavanymi elemientami aharodžy kaścioła źjaŭlajucca vieśnički, jakija ŭstanoviać na adnoŭlenych bakavych leśvicach. Fota: prajektnaja dakumientacyja

Kavanyja aharodžy, jakija možna było pryniać za tyja, jakija ŭstanoviać vakoł kaścioła ŭ budučyni, pa słovach aŭtaraŭ kanała, naadvarot byli demantavanyja ŭ čas rekanstrukcyi.

Schiema raźmiaščeńnia elemienta aharodžaŭ i leśvic. Leśvica kala pomnika Archaniołu Michału isnavała da 1970-ch, paśla čaho jaje zamuravali, jak i hałoŭnuju leśvicu. Na bakavych leśvicach i ŭstanoviać kavanyja vieśnički, jakija byli histaryčna. Fota: prajektnaja dakumientacyja

Taksama «Spadčyna» abviarhaje zajavy nienazvanaha ekśpierta pra toje, što kavanych elemientaŭ na kaścielnaj aharodžy nie było. Pad kavanymi elemientami ŭ prajekcie razumiejucca dvoje kavanych vieśničak, jakija ŭstanoviać na adnoŭlenych bakavych leśvicach.

Kavanyja varoty kaścioła na histaryčnym zdymku

Zachavanyja kaścielnyja varoty, jakija spačatku stajali na hałoŭnym uvachodzie, a kali jaho zakłali ŭ 1970-ja — vykarystoŭvalisia na zadnim padjeździe da budynka, dzie ciapier šłahbaum. Jany pasłužyli asnovaj dla adnaŭleńnia astatnich vieśničak. Fota: telehram-kanał «Spadčyna»

Krynicaj dla adnaŭleńnia kavanych vieśničak pasłužyli jak histaryčnyja zdymki, tak varoty kaścioła, jakija źbierahlisia da našaha času.

Sama aharodža, jakuju płanujuć pabudavać, dakładna paŭtaraje histaryčnuju aharodžu, jakaja źjaviłasia ŭ toj ža čas, što i kaścioł, i źjaŭlajecca nieadjemnaj častkaj zadumy architektara. Pa słovach kanała, zachavalisia navat aryhinalnyja hranitnyja słupki, jakija buduć viernutyja na svajo miesca.

Asabliva byli raskrytykavanyja słovy ekśpierta pra toje, što aharodža była vakoł kaścioła tolki z samaha pačatku, kali chram byŭ pabudavany, a jaje adzinym pryznačeńniem było zaścierahać ad koniej i vypadkovaj žyvioły. Ekśpiert padvodzić da dumki, što jaje adnaŭleńnie ŭ naš čas pazbaŭlena jakoha-niebudź sensu i heta tolki sposab «nakrucić kaštarys».

Darevalucyjny fotazdymak kaścioła, na jakim jašče zastajecca budaŭničy płot, vyšejšy za rost čałavieka. Za płotam — vysokija słupy abapał leśvic, jakija nie byli b vidać, kali b płošča i terytoryja kaścioła byli na adnym uzroŭni

Fotazdymak 1910-ch z aharodžaj na vysokaj padpornaj ściency, jakaja pa plečy minakam. Pra toje, što aharodža zaścierahała kaścioł ad koniej, nie moža być i havorki

Aŭtary telehram-kanała «Spadčyna» zasumniavalisia ŭ kampietentnaści takoj ekśpiertyzy, jak z punktu hledžańnia padychodaŭ da restaŭracyi ahułam, tak i z punktu hledžańnia nieadpaviednaści faktam. 

«Zajavy pra toje, što adnaŭleńnie stračanaha elemienta pomnika architektury, heta «sproba nakrucić kaštarys», takaja ž duraść, jak kazać, što lubaja restaŭracyja — heta sproba nakrucić kaštarys ramontu», — adkazvaje kanał.

Maršał Cimašenka na fota parada 1 maja 1952 hoda. Za śpinaj — aharodža kaścioła na vysokaj butavaj padpornaj ściency

Fotazdymak kaścioła 1970 hoda, kali adbyvałasia rekanstrukcyja pad Dom kino. Na fota ŭsio jašče bačnaja histaryčnaja aharodža kaścioła. Na momant stvareńnia zdymka aharodža ŭžo isnavała 60 hadoŭ

«Spadčyna» pryvodzić fotazdymki roznych hadoŭ, jakija paćviardžać, što aharodža vakoł kaścioła źjaviłasia ŭ 1910-m i praisnavała da samaha pačatku 1970-ch hadoŭ, kali kaścioł byŭ pierabudavany pad Dom kino.

Takim čynam aharodža praisnavała vakoł kaścioła 60 hadoŭ, a adsutničaje — tolki 55 hadoŭ.

Čyrvony kaścioł u 1976 hodzie. Paśla rekanstrukcyi pad Dom kino aharodža była prybranaja

Taksama nie znachodzić paćviardžeńnia toje, što płošča pierad kaściołam była značna panižana ŭ jaki-niebudź čas: na ŭsich fota jana staić na vysokaj, pa plačo čałavieka, butavaj padpornaj ściency. A heta aznačaje, što jaje pryznačeńnie nijak nie było źviazana z tym, kab zaścierahać ad koniej terytoryju chrama.

«Atrymlivajecca, što ŭ hetym artykule ŭsio ad pačatku da kanca chłuśnia ci fantazii. Padajecca, parafija śviadoma manipuluje rekanstrukcyjaj, kab vyklikać abureńnie hramadskaści na pustym miescy, pieraśledujučy niejkija svaje mety», — padsumoŭvaje telehram-kanał «Spadčyna». 

Kamientary da artykuła