Kamandziram važnaj bryhady USU staŭ 26-hadovy: što viadoma pra Hieroja Ukrainy Maksima Danilčuka

Kiraŭnictva Ukrainy pryncypova daje darohu maładym. Pryznačeńnie novaha kamandzira 47‑j asobnaj miechanizavanaj bryhady «Mahura» stała typovym prykładam taho.

Maksim Danilčuk. Fota: zt.otck / Facebook

Novy kamandzir — karjerny vajskoviec, słužba jakoha prypała amal całkam na čas vajny, tamu pra jaho infarmacyi pakul mała. Viadoma, što padpałkoŭnik Maksim Danilčuk naradziŭsia ŭ vioscy Barvinaŭka Žytomirskaj vobłaści. Jon vypusknik prestyžnaj Nacyjanalnaj akademii suchaputnych vojskaŭ. 

Danilčuk pačaŭ svoj bajavy šlach jak kamandzir roty ŭ 30‑j asobnaj miechanizavanaj bryhadzie (AMBr) imia kniazia Kanstancina Astrožskaha. Dziakujučy prafiesijanalizmu i lidarskim jakaściam, nieŭzabavie staŭ načalnikam štaba, a potym i kamandziram 2‑ha miechanizavanaha bataljona 30 AMBr. 

Padraździaleńni pad jaho kiraŭnictvam vykonvali bajavyja zadačy na samych składanych učastkach frontu ŭ Danieckaj i Charkaŭskaj abłaściach. Dziakujučy jaho kamandzirskim rašeńniam źniščyli značnuju kolkaść rasijskich vojskaŭ i techniki. Adnym ź jaskravych epizodaŭ staŭ luty 2023 hoda, kali bataljon Danilčuka na Danbasie paśpiachova adbiŭ šmatlikija ataki šturmavych hrup PVK «Vahnier».

Mužnaść i talent Danilčuka byli vysoka acenienyja. 24 lutaha 2024 hoda Prezident Uładzimir Zialenski prysvoiŭ Maksimu Danilčuku zvańnie Hieroja Ukrainy. Jon taksama źjaŭlajecca kavaleram ordenaŭ Bahdana Chmialnickaha II i III stupieniaŭ (2023, 2022) i ordena «Za mužnaść» III stupieni (2022).

Były kamandzir Danilčuka — pałkoŭnik Uładzimir Silenka, tak charaktaryzavaŭ maładoha aficera:

«Jamu ŭsiaho 24 hady [na toj momant], a jon užo dva hady viadzie aktyŭnyja bajavyja dziejańni. Kali ty z takimi ludźmi razmaŭlaješ, jany ciabie pryciahvajuć. Kreatyŭnaść tut pobač, jana voś — biary i pracuj».

Situcyja ŭ 47‑j bryhadzie «Mahura»

Pryznačeńnie Maksima Danilčuka adbyłosia paśla skandału ŭ 47‑j bryhadzie. Jaho papiarednik na pasadzie kambryha, Alaksandr Šyršyn, u mai padaŭ rapart na zvalnieńnie, abvinavaciŭšy vyšejšaje kamandavańnie ŭ «biessensoŭnych zadačach» i nieapraŭdanych stratach asabovaha składu padčas ciažkich bajoŭ.

Hetyja padziei vyklikali surjozny rezanans, i Hienieralny štab USU stvaryŭ śpiecyjalnuju kamisiju dla rasśledavańnia abstavin.

U takoj niaprostaj situacyi prychod maładoha, ale aŭtarytetnaha i ŭhanaravanaha kamandzira, jaki maje biezdakornuju reputacyju, razhladajecca jak krok, jaki ŭmacuje bajavy duch i ŭkarenić novyja, bolš efiektyŭnyja padychody ŭ kiravańni adnym z klučavych padraździaleńniaŭ ukrainskaj armii.

Kamientary da artykuła