U Hdańsku dvoje biełarusaŭ pahražali pistaletam nihieryjcu
U polskim Hdańsku palicyja zatrymała dvuch mužčyn, jakija pahražali kiroŭcu taksi zbrojaj. Jany prykłali da hałavy 27‑hadovaha kiroŭcy pistalet i zahadali advieźci ich u Sopat. Ciapier im pahražaje da troch hadoŭ pazbaŭleńnia voli.
Fota: gdansk.policja.gov.pl
Incydent adbyŭsia ŭ minułuju subotu pozna ŭviečary. U palicyju źviarnuŭsia hramadzianin Nihieryi, jaki pracuje ŭ śfiery pieravozki pasažyraŭ.
Kala 22:30 jon uziaŭ dvuch klijentaŭ z vulicy Hłybokaj i pavinien byŭ advieźci ich u centr horada. Pa darozie pasažyry patrabavali, kab jon źmianiŭ kirunak i pavioz ich u Sopat. Kiroŭca skazaŭ, što heta kaštuje daražej, i tady adzin z mužčyn dastaŭ pistalet dy prykłaŭ jaho da hałavy kiroŭcy. Spałochany nihieryjec spyniŭ mašynu, vybieh i pačaŭ klikać na dapamohu. Złamyśniki taksama ŭciakli, a paciarpieły adrazu pajechaŭ u palicyju.
U palicyi pačali rasśledavańnie, vyvučyli kamiery videanazirańnia i chutka vyśvietlili, što padazronyja — dvoje hramadzian Biełarusi, 40 i 32 hadoŭ. Jany ŭžo nie žyli pa papiarednich adrasach, ale palicyja vyśvietliła, što jany mahli znachodzicca ŭ Sopacie. Uličvajučy, što ŭ ich mahła być zbroja, apieracyja pravodziłasia z aściarohaj.
18 vieraśnia ranicaj palicejskija ŭvajšli ŭ adnu z kvater u Sopacie i zatrymali abodvuch mužčyn, jakija spali. Padčas vobšuku znajšli pnieŭmatyčny pistalet.
Fota: gdansk.policja.gov.pl
Zatrymanym pradjavili abvinavačańni ŭ prymusie da dziejańniaŭ pry dapamozie zbroi. Im pahražaje da troch hadoŭ źniavoleńnia.