Restaŭratary adnavili kaplicu ŭ siadzibie Ahinskich. Jaje raskrytykavali za niedakładnaści

Siońnia ŭ vioscy Ručyca Vilejskaha rajona adkryjecca adna z adnoŭlenych kaplic siadziby «Hanuta». Ale śpiecyjalisty adznačajuć, što adnaŭleńnie vielmi hrubaje i skažaje histaryčny vyhlad pomnika baroka. 

Adnoŭlenaja kaplica ŭ Hanucie i taja ž kaplica na fotazdymku pačatku XX stahodździa. Kali nie ŭhladacca, to vyhladaje padobna, ale djabał u detalach. Fota: telehram-kanał «Spadčyna» / Wikimedia Commons

Abjekt adnaŭlała Respublikanskaje hramadskaje abjadnańnie restaŭrataraŭ pa prajekcie «Biełžyłprajekta» da 260‑hodździa z dnia naradžeńnia Michała Kleafasa Ahinskaha. 

Dźvie baročnyja kaplicy na terytoryi siadziby Ahinskich «Hanuta», jakija kaliści źmiaščali skulptury śviatych pad svaimi baročnymi kupałami, jak i inšyja zbudavańni siadziby, byli ŭźviedzienyja jašče ŭ 1765 hodzie italjanskim architektaram Abrachamam Hienu, jaki taksama stvaryŭ Lavonpalskuju siadzibu.

Ad byłoj siadziby Ahinskich amal ničoha nie zastałosia, niama skulptur u kaplicach, a sami jany trapili ŭ avaryjny stan. Miascovyja aktyvisty daremna papiaredžvali pra niebiaśpieku razbureńnia — čynoŭniki nie reahavali. Tolki paśla taho, jak u kastryčniku 2020 hoda adna z kaplic abvaliłasia, ułady źviarnuli ŭvahu na prablemu.

Adnoŭlenaja kaplica ŭ siadzibie Ahinskich. Fota: fota z sacsietak

Ale adnaŭleńnie pačałosia tolki ŭ 2024 hodzie za srodki Respublikanskaha hramadskaha abjadnańnia restaŭrataraŭ. Pakul adnavili tolki lepš zachavanuju kaplicu. Praŭda, vynik adroźnivajecca nie tolki ad histaryčnych vyjaŭ, ale i ad prajekta. 

Teleham-kanał «Spadčyna» źviarnuŭ uvahu na toje, što dla aficyjnaha pomnika architektury detaliroŭka zroblena vielmi hruba i nie adpaviadaje pryncypam navukovaj restaŭracyi. 

Prajekt adnaŭleńnia kaplicy ŭ Ručycy. Fota z sacsietak

Aŭtary kanała asabliva krytykujuć formu baročnaha šlema, jakaja istotna adroźnivajecca ad histaryčnaj: źmianilisia praporcyi, źnikła charakternaja pukataść, źjavilisia elemienty, jakich nikoli nie było, ale źnikli tyja, što musili być.

Baročny kupał kaplicy tolki addalena nahadvaje histaryčny, jon maje inšyja praporcyi, adsutničajuć vuhłavyja vystupy, ale źnizu źjaviŭsia 10‑santymietrovy «łabok», jakoha nikoli nie było. Fota: telehram-kanał «Spadčyna»

Krytyka datyčyć i karnizaŭ: zamiest składanych ordarnych profilaŭ zrabili niekalki hrubych «prystupak», jakija nie paŭtarajuć vystupy vuhłavych pilastraŭ, jak heta pryniata ŭ baroka. 

Pry hetym zachavalisia nie tolki histaryčnyja zdymki, ale i druhaja, identyčnaja kaplica, na jakuju možna było b aryjentavacca pry adnaŭleńni, ale hetaj mahčymaściu nie skarystalisia.

Majučy histaryčnyja fotazdymki, prajektnyja čarciažy i zachavanyja frahmienty druhoj kaplicy, budaŭniki nie zmahli paŭtaryć histaryčnyja karnizy, zrabiŭšy prymityŭnyja, sproščanyja karnizy, jakich nie mahło być na pomniku baroka. Fota: telehram-kanał «Spadčyna»

Padobnyja prablemy ŭžo ŭźnikali na inšych kaplicach, jakija nie mieli achoŭnaha statusu, adnak u vypadku z «Hanutaju» havorka idzie pra historyka-kulturnuju kaštoŭnaść.

Aŭtary kanała adznačajuć, što chacia adnoŭlenaja kaplica ciapier nie razvalicca, niajakasnaja restaŭracyja horšaja za ščyruju ruinu, bo biełaruskaj praktycy nieviadomyja vypadki, kali b niaŭdałyja adnaŭleńni vypraŭlalisia paźniej.

Kamientary da artykuła