Biełaruska pierad vyletam ź Vilni zabyłasia dakumienty ŭ aŭtobusie ź Minska. Jak skončyłasia historyja
Noč 28 vieraśnia atrymałasia stresavaj dla Ały. Jana adpraviła dačku-padletka na aŭtobusie Minsk — Vilnia. Dziaŭčyna mała taho, što nie vyjšła ŭ aeraporcie, dyk jašče i zabyłasia svaje dakumienty ŭ aŭtobusie. A ŭ jaje byŭ vylet ź Vilni, piša BG.Media.
Ilustracyjny zdymak
U adnym z pryhraničnych čataŭ Ała raskazała svaju historyju.
«Dobry viečar. Patrebna dapamoha. Aŭtobus Eurolines. Vyjezd byŭ u 22:00 [27 vieraśnia] ź Minska ŭ Vilniu. Tolki što pavinien pryjechać u aeraport Vilni. Chto-niebudź jedzie ŭ im? Vyhruzilisia ŭ aeraporcie ŭžo? Patrebny vielmi kiroŭca. Dačka zabyłasia dakumienty ŭ aŭtobusie, a sama vyjšła na aŭtavakzale», — napisała Ała ŭ pryhraničnym čacie.
Niekatoryja karystalniki čata nie pavieryli, što aŭtobus spačatku spyniajecca na aŭtavakzale Vilni, a potym jedzie ŭ aeraport. Pavodle ich słoŭ, usio naadvarot:
«Aŭtavakzał — kančatkovy prypynak. Spačatku zajazdžajuć u aeraport, a potym na aŭtavakzał. Hety aŭtobus zaraz dakładna nie ŭ aeraporcie, jon, chutčej za ŭsio, pajechaŭ u haraž albo kudyści na parkoŭku. Źviazacca možna tolki z Eurolines, detali ŭ ich na sajcie».
Ała patłumačyła, jak tak atrymałasia: dačka zapeŭnivaje, što spačatku jaje vysadzili na aŭtavakzale, a potym častka ludziej pajechała ŭ aeraport.
Ała pamyliłasia z kuplaj bileta i kančatkovym prypynkam paznačyła nie aeraport.
«Dačka ničoha nie praspała i nie prapuściła prypynak u aeraporcie. U Eurolines jość sapraŭdy rejs na 20:00 ź Minska, jon jedzie tolki na aŭtavakzał! I kančatkovy prypynak u bilecie paznačany byŭ aŭtavakzał. Heta ja prahledzieła i kupiła bilet nie na 20:40, u hetaha rejsa jość prypynak u aeraporcie i na vakzale», — raskazała žančyna.
Viarnuć dakumienty ŭdałosia dziakujučy kiroŭcu Eurolines. Jon sam źviazaŭsia praz Facebook z dačkoj Ały i paviedamiŭ svajoj kampanii pra zhublenyja dakumienty, a potym pieradaŭ ich na bazu. Inšy kiroŭca pahadziŭsia nočču pryvieźci dziaŭčynu da hetaj «bazy-haraža», dzie stajać aŭtobusy. Jana sama znajšła jaho na aŭtavakzale i patłumačyła situacyju.
«Ničoha b nie atrymałasia, kali b ja papiarednie nie zakłała na ŭsialaki vypadak lišnija 3 hadziny [da adpraŭleńnia samalota]», — napisała Ała.
Jaje dačka zabrała dakumienty i paśpieła na samalot.