Cichanoŭskaja zaklikała Jeŭropu bolš rašuča spryjać vyzvaleńniu palitviaźniaŭ

Na samicie Jeŭrapiejskaj palityčnaj supolnaści ŭ Kapienhahienie kiraŭnik Abjadnanaha pierachodnaha kabinieta i demakratyčnaja lidarka vystupiła na pres-kanfierencyi, adkryŭšy jaje karotkaj zajavaj.

Fota: pres-słužba Śviatłany Cichanoŭskaj

«Chaču padziakavać Danii i Jeŭrapiejskaj palityčnaj supolnaści za zaprašeńnie. Dyktatary, Pucin i Łukašenka, tut adsutničajuć — ale hołas biełaruskaha narodu hučyć. Biełarusy zasłuhoŭvajuć jeŭrapiejskaj budučyni. Biełaruś naležyć Jeŭropie — i adnojčy my staniem paŭnapraŭnym siabram EPC i Jeŭrapiejskaha sajuzu.

Naša meta zrazumiełaja: nie dapuścić, kab Rasija znoŭ vykarystoŭvała Biełaruś jak płacdarm — suprać Ukrainy ci suprać Jeŭropy. Heta aznačaje demantaž aŭtarytarnaha režymu Łukašenki, jaki staŭ pahrozaj dla ŭsiaho kantynientu», — skazała jana.

Pavodle Śviatłany Cichanoŭskaj, «razam z prezidentam Trampam i jaho kamandaj my ŭžo damahlisia vyzvaleńnia dziasiatkaŭ palitviaźniaŭ, ale 1300 zastajucca za kratami». 

«My vitajem namahańni ZŠA, ale Jeŭropa taksama pavinna trymać cisk, pakul nie budzie vyzvaleny kožny viazień i nie skončacca represii. Adnačasova Jeŭropa pavinna padtrymlivać biełarusaŭ — vydavać vizy, akazvać padtrymku hramadzianskaj supolnaści i dapamahać tym, chto ciapier faktyčna biez hramadzianstva», — pierakananaja biełaruski palityk.

Śviatłana Cichanoŭskaja zaklikała Jeŭropu dziejničać rašuča, bo «paŭmiery tolki natchniajuć dyktataraŭ»: «My musim asłabić Rasiju, umacavać Ukrainu i adkryć akno dla pieramienaŭ u Biełarusi. I ja vieru, što pieramieny ŭ Biełarusi mohuć stać šturškom dla pieramienaŭ u Rasii».

Palityk biare ŭdzieł u Samicie Jeŭrapiejskaj palityčnaj supolnaści (EPC), jaki adbyvajecca z udziełam bolš čym 50 lidaraŭ jeŭrapiejskich krainaŭ. Jana ŭžo sustrełasia z prezidentam Litvy, kancleram Hiermanii, prezidentam Ukrainy i inšymi jeŭrapiejskimi lidarami. 

Kamientary da artykuła