Łukašenka prapanavaŭ šyrej ukaraniać pierapialinyja jajki ŭ školnaje mieniu
Alaksandr Łukašenka padčas rabočaj pajezdki ŭ Salihorski rajon, dzie jon naviedaŭ pierapialinuju fiermu, daručyŭ prapracavać bolš šyrokaje vykarystańnie pierapialinych jajek, u tym liku pry arhanizacyi charčavańnia dziaciej u škołach, piša BiełTA.
«My abmiarkoŭvali temu bolšaha spažyvańnia jajka. Ina (dyrektarka Salihorskaj ptuškafabryki InaTałkačova) kaža, što jany byli b nie suprać, kab škoły bolš brali. I Japoniju pryvodziła ŭ prykład, što jany heta robiać, — skazaŭ Łukašenka. — Treba prapracavać z nastupnaha hoda. A čamu nie? Jana, akazvajecca, varyć hetaje jajka i ačyščanaje pastaŭlaje».
Pa svaich karysnych jakaściach pierapialinyja jajki na tracinu lepšyja za kurynyja.
«Žurnalistam — usim pierapialinyja jajki jeści», — dadaŭ jon.