Aeraport Miunchiena znoŭ zakryvali z-za palotaŭ dronaŭ
Druhi raz za apošnija sutki abiedźvie ŭźlotna-pasadačnyja pałosy ŭ aeraporcie Miunchiena zakryty, pakolki pablizu byli zaŭvažanyja drony nieviadomaha pachodžańnia.
Aeraport Miunchiena. Ilustracyjnaje fota Walter Bibikov / Getty Images
«Niamieckija avijadyśpietčary abmiežavali paloty ŭ aeraporcie Miunchiena ŭ jakaści miery zaściarohi z-za niepaćvierdžanaha vyjaŭleńnia dronaŭ», — havorycca ŭ zajavie aeraporta. Paloty prypynienyja «da dalejšych paviedamleńniaŭ».
Uviečary ŭ čaćvier aeraport Miunchiena taksama zakryvaŭsia na niekalki hadzin, pakolki ŭłady zapadazryli, što pobač ź im źjavilisia drony.
«Kali nam siońnia nie dazvolać latać, to dakładna zatrymajucca bolš pasažyraŭ, čym tyja try tysiačy, što byli ŭ noč na 3 kastryčnika», — cytuje Reuters aficyjnaha pradstaŭnika aeraporta.
Na minułym tydni z-za nieviadomych dronaŭ daviałosia na niekatory čas zakryć aeraporty Kapienhahiena i Osła, na hetym tydni, u aŭtorak, dron znoŭ byŭ zaŭvažany pobač z narviežskim aeraportam, ale nie ŭ Osła, a ŭ horadzie Brojniesun, nahadvaje Bi-bi-si.
Darečy, učora padčas vystupu ŭ Sočy Uładzimir Pucin pažartavaŭ pra drony ŭ Jeŭropie.
Kali ŭ kiraŭnika Kramla spytali, ci zapuskaŭ jon drony ŭ Daniju, Pucin zaśmiajaŭsia i, zrabiŭšy rukoju pahardlivy žest, adkazaŭ: «Ja bolš nie budu. Ni ŭ Francyju, ni ŭ Daniju. Kudy jašče dalatajuć? U Lisabon».
Akramia taho, jon navat paraŭnaŭ tryvohu jeŭrapiejcaŭ nakont dronaŭ z panikaj pierad NŁA: «Viedajecie, tam zabaŭlajucca ludzi, jakija kaliści zabaŭlalisia nakont NŁA. Tam stolki dzivakoŭ, jak i ŭ nas, darečy kažučy. Ničym nie adroźnivajucca, asabliva maładyja ludzi».