Novuju chutkasnuju čyhunku ŭ minski aeraport pačnuć budavać užo sioleta

Paśla doŭhich hadoŭ padrychtoŭki i ŭzhadnieńniaŭ, padobna, narešcie pačynajuć budavać chutkasnuju čyhunku ŭ Nacyjanalny aeraport Minsk, piša Blizko.by.

Fota ilustracyjnaje

Na sajcie dziaržzakupak źjavilisia pieršyja tendary na vykanańnie padrychtoŭčych rabot dla budaŭnictva.

Pieršy tendar nazyvajecca «Vykanańnie rabot pa vysiakańni i pierasadcy dreŭ i kustoŭ pa-za miežami pałasy advodu čyhunki na abjekcie «Arhanizacyja chutkasnych pasažyrskich čyhunačnych znosin Minsk — Haradzišča — Kitajska-biełaruski industryjalny park «Vialiki kamień» — Nacyjanalny aeraport Minsk. 1‑ia čarha», pierahon Kałodziščy — Haradzišča».

Druhi — «Vybar subpadradnaj arhanizacyi pa vynasie sietak hazazabieśpiačeńnia na abjekcie «Arhanizacyja chutkasnych pasažyrskich čyhunačnych znosin Minsk — Haradzišča — Kitajska-biełaruski industryjalny park «Vialiki kamień» — Nacyjanalny aeraport Minsk. 1‑ia čarha», pierahon Kałodziščy — Haradzišča».

Hetyja raboty płanujuć pačać užo sioleta: vysiakańnie dreŭ treba pravieści da kanca listapada 2025-ha.

Abodva tendary pravodzić AAT «Darbudmantažtrest», filijał «Budaŭniča-mantažny ciahnik №169 na stancyi Viciebsk».

Miarkujecca, što čyhunka projdzie pa najaŭnym maršrucie ad stancyi Minsk-Pasažyrski praz Kałodziščy da stancyi Haradzišča, paśla jakoj u bok aeraporta dabudujuć 18 kiłamietraŭ novych čyhunačnych puciej. Praciahłaść maršrutu składzie 41,8 kiłamietra, aryjencirovačny čas u darozie ad pačatkovaj stancyi da kancavoj — 28‑30 chvilin.

U 2020‑2021 hadach pravodzilisia hramadskija abmierkavańni pa abjekcie, paśla paviedamlałasia pra prajektavańnie ŭ 2021‑2024 hadach i nastupnuju ekśpiertyzu prajekta.

Kamientary da artykuła