Na videa pra mahiloŭskaha mańjaka siłaviki trymajuć jaho na doŭhich ramianiach. Što heta i navošta?

Abvinavačanaha ŭ sieryi zabojstvaŭ dziaŭčynak z Mahilova zatrymali na minułym tydni. 53‑hadovy Juryj Dziamjanaŭ chavaŭsia bolš za 25 hadoŭ i, pavodle zajaŭ siłavikoŭ, ździajśniaŭ złačynstvy na terytoryi adrazu troch abłaściej. Na videa śledčaha ekśpierymientu bačna, što zatrymany ŭ kajdankach i źviazany ramianiami, doŭhija kancy jakich trymajuć niekalki supracoŭnikaŭ śpiecpadraździaleńniaŭ. Što heta i navošta, «Lusterka» spytała ŭ Belpol.

Abvinavačany ŭ sieryi zabojstvaŭ dziaŭčynak u 1990‑ia Juryj Dziamjanaŭ padčas śledčaha ekśpierymientu. Mahiloŭ, kastryčnik 2025 hoda. Skrynšot: videa dziaržaŭnaha kanała ANT.

«Heta prosta novyja mietady kanvairavańnia čałavieka, jakoha abvinavačvajuć u asabliva ciažkich złačynstvach, — raskazaŭ pradstaŭnik Belpol Uładzimir Žyhar, jaki da 2020 hoda pracavaŭ opierupaŭnavažanym kryminalnaha vyšuku Mazyrskaha RAUS. — Raniej vykarystoŭvali łancuhi, ciapier — takoje».

Žyhar adznačyŭ, što dla kanvoju asob, jakija ździejśnili asabliva ciažkija złačynstvy, zvyčajna pryznačajuć troch čałaviek — adpaviedna z unutranym zahadam.

«Heta miery biaśpieki jak dla kanvairavanaha, tak i dla tych, chto jaho supravadžaje, — tłumačyć jon. — A ramiani patrebnyja, kab abvinavačany nie nanios sabie cialesnych paškodžańniaŭ i nie napaŭ na kanvairaŭ. Treba taksama ŭličvać, što śledčyja dziejańni prachodziać na dachu, a tamu miery zaściarohi ŭzmacniajucca, bo čałaviek moža pasprabavać ździejśnić suicyd».

U toj ža čas, jak udakładniaje Žyhar, navat u padobnych vypadkach ramiani abo łancuhi vykarystoŭvajuć nie zaŭsiody. Naprykład, u sud takich abvinavačanych zvyčajna dastaŭlajuć tolki ŭ kajdankach.

«Ale tut situacyja rezanansnaja», — adznačaje były siłavik i nie vyklučaje, što ramiani dla Dziamjanava mohuć vykarystoŭvać pastajanna.

Kamientary da artykuła