Sotni pratestoŭcaŭ napali na kartež prezidenta Ekvadora
Heta adbyłosia ŭ pravincyi Kańjar u centralnaj častcy Ekvadora, kali prezident Daniel Naboa jechaŭ na adkryćcio ačyščalnych zbudavańniaŭ.
Fota: Presidencia Ecuador/X
Kartež akružyli sotni pratestoŭcaŭ, jakija, pavodle danych uładaŭ, kidali kamiani i cehłu, a taksama ŭžyvali ahniastrelnuju zbroju, piša Bi-bi-si.
«Kala 500 čałaviek źjavilisia i kidali kamiani, na aŭtamabili prezidenta taksama jość vidavočnyja ślady ad kul», — skazała ministr achovy navakolnaha asiarodździa Ines Mansana.
Pavodle jaje słoŭ, piać čałaviek byli zatrymanyja, sam prezident nie paciarpieŭ. Ułady zajavili, što zatrymanyja buduć «pryciahnutyja da adkaznaści za teraryzm i zamach na zabojstva».
Pres-słužba prezidenta taksama apublikavała ŭ X fota paškodžanaha prezidenckaha ŭsiodarožnika i videa, źniataje z sałona inšaha aŭtamabila padčas napadu.
U Ekvadory prachodziać masavyja pratesty suprać pavyšeńnia cen na dyzielnaje paliva, jakija supravadžajucca sutyknieńniami. Ułady abvinavačvajuć u biesparadkach narkakarteli.