Pieravydadziena kniha pra kiraŭnika ŭrada BNR Ramana Skirmunta
Hrodzienski historyk Aleś Smalančuk pieravydaŭ knihu «Raman Skirmunt (1868−1939). Žyćciapis hramadzianina Kraju». Jana raspaviadaje pra asobu byłoha premjera ŭrada BNR i sienatara Polščy.
Kniha vyjšła 7 kastryčnika — u hety dzień u 1939 hodzie Skirmunta zabili ŭ Pinskim rajonie, piša Hrodna.life.
Kniha składajecca ź bijahrafii Ramana Skirmunta — u jaje ŭnieśli novyja fakty. Uličyli zaŭvahi recenzientaŭ. Taksama ŭ vydańnie ŭvajšli aryhinalnyja ilustracyi. Pieršaja viersija vyjšła ŭ 2019 hodzie.
Z pradmovy da druhoha vydańnia: «[…] Raman Skirmunt — heta zaŭsiodny napamin pra važnaść adzinstva biełaruskich palityčnych sił. Letam 1918 h. jon jak kiraŭnik uradu BNR u intervju žurnalistam «Minskoho ježieniedielnika» zajaviŭ: «Ciapier moment, kali patrebujecca źbirańnie ŭsich intelihientnych siłaŭ kraju dla tvorčaj pracy ŭ dziele asnavańnia Biełaruskaj dziaržaŭnaści. […] Treba sabrać usie siły, jakija mohuć być karysnymi, jak u dzieržaŭna-tvorčaj pracy, tak i dla kulturna-ekanamičnaho adradžeńnia kraju».
Prezientacyi knihi adbuducca padčas knižnaha fiestyvalu «Pradmova». Pieršaja ź ich zapłanavana ŭ Vilnie 12 kastryčnika. Taksama zamović asobnik možna praz e-mail kanała Hrodna 11:27 — hrodna1127@gmail.com.
U stvareńni vydańnia ŭdzielničała Haradzienskaja biblijateka, histaryčny kanał Hrodna 11:27 i jeŭrapiejskija fondy — Kolegium Europy Wschodniej, a taksama Orsa-Romano Cultural Foundation Inc.