Nobieleŭskuju premiju miru atrymała lidarka vieniesuelskaj apazicyi Maryja Karyna Mačada

Jana praciŭnica dyktatara Madura, była kandydatkaj u prezidenty, jakoj nie dazvolili bałatavacca.

Fota: Jesus Vargas/Getty Images

Narviežski Nobieleŭski kamitet adznačyŭ Mačada «za jaje niastomnuju pracu dziela realizacyi demakratyčnych pravoŭ naroda Vieniesueły i za jaje baraćbu za spraviadlivy i mirny pierachod ad dyktatury da demakratyi».

Maryja Karyna Mačada naradziłasia ŭ 1967 hodzie. Jaje pradziedam byŭ Eduarda Błanka — vieniesuelski palityk i piśmieńnik, zabity padčas paŭstańnia suprać vieniesuelskaha dyktatara Chuana Visente Homiesa. Skončyła ŭniviersitet pa śpiecyjalnaści «pramysłovaje mašynabudavańnie», maje stupień mahistra ŭ halinie finansaŭ Instytuta pierśpiektyŭnych daśledavańniaŭ u halinie kiravańnia ŭ Karakasie.

U 1992 hodzie Mačada zasnavała dabračynny fond «Ateniea», srodki jakoha byli nakiravanyja na dapamohu dzieciam-sirotam i biazdomnym dzieciam Karakasa.

Była deputatam Nacyjanalnaj asamblei Vieniesueły (2011—2014), była zasnavalnicaj dabračynnaj arhanizacyi Súmate. Sprabavała bałatavacca ŭ prezidenty Vieniesueły na vybarach 2012 hoda, adnak nie vyjhrała apazicyjnyja prajmieryz.

Mačada była adnoj ź viadučych fihur padčas vieniesuelskich pratestaŭ 2014 hoda suprać urada Nikałasa Madura.

Jaje nie zarehistravali kandydatam na minułych prezidenckich vybarach u 2024 hodzie, tamu pradstaŭnikom ad abjadnanaj apazicyi staŭ Edmunda Hansales. Jany ŭdvaich brali ŭdzieł u mitynhach. 

Maryja Karyna Mačade zaraz znachodzicca ŭ Vieniesuele, joj zabaronieny vyjezd z krainy.

***

U minułym hodzie nobieleŭskuju premiju miru atrymała japonskaja arhanizacyja «Nichon Chiadnkio» za «namahańni pa dasiahnieńni miru, svabodnaha ad jadziernaj zbroi», u 2022 hodzie — Aleś Bialacki.

Učora byŭ nazvany nobieleŭski łaŭreat pa litaratury. Im staŭ vienhierski piśmieńnik Łasła Krasnacharkai.

Zavieršycca nobieleŭski tydzień u paniadziełak abviaščeńniem łaŭreata pa ekanomicy.

Uručeńnie premij projdzie ŭ śniežni.

Kamientary da artykuła