Ukraina addała Litvie rasijskaha vajskoŭca, jakoha padazrajuć u vajennym złačynstvie suprać litoŭca
Jamu pahražaje pažyćciovaje źniavoleńnie za katavańni žycharoŭ Mielitopala.
Rasijskija sałdaty va Ukrainie, ilustracyjnaje fota Russian Defense Ministry Press Service via AP
U Litvie jamu vystaŭlenyja abvinavačańni ŭ vajennych złačynstvach suprać mirnaha nasielnictva i vajennapałonnych, u ich katavańniach i niezakonnym pazbaŭleńni voli. Pavodle zakanadaŭstva Litvy, padazravanamu pahražaje ad 10 da 20 hadoŭ pazbaŭleńnia voli abo pažyćciovaje źniavoleńnie, piša Delfi.lt.
«Chočam paviedamić pra vyklučny vynik mižnarodnaha supracoŭnictva. 29 kastryčnika z Ukrainy ŭ Litvu dastavili i pieradali čałavieka, padazravanaha ŭ vajennych złačynstvach va Ukrainie, ździejśnienych suprać adnaho hramadzianina Litvy», — zajaviła hienieralny prakuror Nida Hrunskienie na pres-kanfierencyi ŭ piatnicu.
Pavodle danych śledstva, z sakavika pa vierasień 2022 hoda vajskoŭcy Uzbrojenych Sił Rasijskaj Fiederacyi, u tym liku asabovy skład 177‑ha asobnaha hvardziejskaha pałka marskoj piachoty Kaśpijskaj fłatylii, udzielničali ŭ arhanizacyi filtracyjnaha łahiera na vučebnaj bazie, raźmieščanaj na terytoryi Mielitopalskaha vajennaha aeradroma.
«Tut niezakonna ŭtrymlivalisia, padviarhalisia katavańniam i prynižeńniam mirnyja žychary i vajennapałonnyja. Siarod ich byŭ adzin hramadzianin Litoŭskaj Respubliki», — skazała N. Hrunskienie.
Pavodle słoŭ hienprakurora, u žniŭni 2023 hoda Uzbrojenyja siły Ukrainy zatrymali staršaha matrosa nazvanaha pałka. Pavodle słoŭ N. Hrunskienie, jon padazrajecca ŭ katavańniach mirnych žycharoŭ i vajennych złačynstvach.
«Jość padazreńni, što jon (matros) razam ź inšymi rasijskimi vajskoŭcami nie tolki achoŭvaŭ niezakonna zatrymanych hramadzianskich asob i vajennapałonnych u zhadanym łahiery, ale i ŭdzielničaŭ u ich źbićciach, katavańniach, zamykańni ŭ mietaličny siejf, udušeńni da straty prytomnaści, padviešvańni sa źviazanymi rukami, utrymańni na chałodnym pavietry, ablivańni chałodnaj vadoj i naniasieńni traŭm elektryčnym tokam», — zajaviła N. Hrunskienie.