Donald Tusk paćvierdziŭ: čyhunka Varšava — Lublin paškodžanaja ŭ vyniku dyviersii
Premjer-ministr Polščy Donald Tusk paćvierdziŭ, što paškodžańnie čyhunki na linii Varšava — Lublin adbyłosia ŭ vyniku dyviersii. Pra heta jon napisaŭ u sacsietcy X.
Fota: donaldtusk / x.com
«Na žal, spraŭdzilisia najhoršyja zdahadki. Na trasie Varšava — Lublin (vioska Mika) adbyŭsia akt dyviersii. Vybuch zaradu źniščyŭ čyhunačny puć. Na miescy pracujuć słužby i prakuratura. Na hetaj ža trasie, bližej da Lublina, taksama kanstatavana paškodžańnie», — zajaviŭ Tusk.
Pra paškodžańnie pucia ŭ vakolicy Miki stała viadoma ŭčora ranicaj, kali mašynist ciahnika, ruchajučysia na małoj chutkaści, zaŭvažyŭ, što vyrvany kavałak rejki. Jon spyniŭsia i paviedamiŭ pra paškodžańnie. ŚMI pišuć, što da hetaha miascovyja žychary čuli huk vybuchu.
Na miescy zdareńnia pracujuć ekstrannyja słužby i prakuratura. Linija Varšava — Lublin źjaŭlajecca častkaj čyhunačnaha pucia, jaki viadzie va Ukrainu. Na paškodžanym učastku ruch arhanizavany pa adnym puci.
Siońnia ranicaj adbyłosia jašče adno zdareńnie: na toj ža linii ŭ vakolicy Pułavaŭ była paškodžana kantaktnaja sietka. Heta pryviało da ekstrannaha spynieńnia ciahnika. U vyniku paškodžany tokapryjomnik łakamatyva, raźbityja try akna ŭ vahonie. Pryčyny zdareńnia pakul nieviadomyja.