Mužčyna skraŭ u Fanipali rovar, dajechaŭ na im da Minska i tam ździejśniŭ jašče adzin kradziež
Niejak ranicaj mužčyna napadpitku prachodziŭ mima doma ŭ Fanipali i ŭbačyŭ rovar. Skraŭ jaho i pajechaŭ na im u Minsk, pišuć Minsk-naviny.
La stadyjona «Dynama» jon zahavaryŭ z dvuma mužčynami, jakija raśpivali ałkahol, i prapanavaŭ im rovar u abmien na toje, kab tyja pačastavali jaho ałkaholem.
Unačy kampanija praciahnuła zastolle ŭ bary na Revalucyjnaj. Tam zhadany mužčyna, skarystaŭšysia zručnym momantam, skraŭ kašalok, jaki lažaŭ na stojcy. U im było 5 dalaraŭ i 954 rubli. Najaŭnyja złodziej paśla patraciŭ na vypiŭku i cyharety.
U chutkim časie mužčynu zatrymali, zaviali kryminalnuju spravu.